Polshanıń Osina awılındaǵı atızlıqqa 20-avgustqa ótetuǵın túnde Rossiya dronı quladı hám jarıldı. Jarılıw júz bergen aymaq Ukraina menen shegaradan shama menen 100 kilometr hám Belarus penen shegaradan 90 kilometr uzaqlıqta jaylasqan.

AQShtıń Rod-Aylend shtatında derlik 40 jıl sudyalıq etken hám Caught in Providence (Providente qamaqqa alınǵanlar) kórsetiwi arqalı dúnyaǵa belgili bolǵan sudya Frenk Kaprio 88 jasında qaytıs boldı. Bul haqqında CNN xabar berdi. Onıń sociallıq tarmaqtaǵı rásmiy betlerinde jazılıwınsha, Kaprio asqazan astı bezi rak keselligine qarsı uzaq hám mártlershe gúresiwden soń qaytıs bolǵan. Bul mazmundaǵı postlar internette 20-avgust kúni járiyalanǵan. Ol ótken háptede Facebookqa qısqa video jaylastırıp, ózin biraz jaman sezip atırǵanı hám emlewxanaǵa jatqarılǵanın bildirip, adamlardan onıń haqı ushın duwa etiwin soraǵan edi.
Nigeriyada sońǵı kúnlerde kúshli jawın aqıbetinde júzege kelgen suw tasqını keminde 47 adamnıń ómirine zıyan jetkerdi, 56 mıńnan aslam adam bolsa baspanasız qaldı. Bul haqqında jergilikli basılımlarǵa súyenip, Anadolu xabar berdi. Rásmiy maǵlıwmatlarǵa bola, suw tasqını 339 máhálle hám awıldaǵı 7754 shańaraqqa zıyan jetkergen. 30 adam úy tóbesiniń basıp qalıwı aqıbetinde, jáne 17 adam bolsa suwǵa shógip, qaytıs bolǵan. Bunnan tısqarı, 70 adam jaraqatlanǵan, 257 bas qaramal nabıt bolǵan.
AQSh prezidenti Donald Tramp hákimshiligi Xalıqaralıq jınayat sudına (XJS) basımdı kúsheytpekte. Atap aytqanda, Mámleketlik departament 20-avgust kúni sudtıń 2 sudya hám 2 prokurorına qarsı sankciyalar engizgenin málim etti. Bul haqqında The Guardian xabar berdi. Atap ótiliwinshe, olar amerikalılar hám izraillılarǵa qarsı tergew hám jınayat isi ashıw processlerine belsene qatnasqanlıqta ayıplanbaqta. Sankciyalar sheńberinde sud hámeldarları AQSh aymaǵındaǵı aktivlerinen ayırılǵan. XJS bul qarardı “sud erkinligine ashıq hújim” dep qaralamaqta. Sol payıtta BMSh ta Qurama Shtatlardıń bul háreketlerinen qáweter bildirgen. Izrail bolsa bul qarardı qollap-quwatlamaqta.
Ullı Britaniyada 18 jasar qız tıshqanlardı “súwretshi”ge aylandırıp, olardıń súwretlerin satıw arqalı dáramat tappaqta. Bul haqqında The Sun xabar berdi.
Ella Vudland tıshqanlar dóretken hár bir shıǵarmadan 500 funt sterlingge shekem (shama menen 672 dollar) payda kóredi. Kemiriwshilerden “dóretiwshi” sıpatında paydalanıw ideyası oǵan 2025-jıldıń fevral ayında kelgen. Qız segiz úy haywanı – Gubler, Rumpel, Rid, Xotch, Morgan, Lyuk, Rossi hám Gideondı akvarel hám boyawlar jaǵılgan xolstlar ústinde juwırtıp, abstrakt súwretler alıwǵa kirisken. Vudland bul mini-shıǵarmalardı onlayn sawdaǵa qoyǵan.

Iroda Jwraeva, Uluǵbek Twxtaev, ÓzA