Mámleketimizde migraciya processlerin durıs baǵdarlaw hám nátiyjeli basqarıw mámleketimiz siyasatında tiykarǵı wazıypalardan biri esaplanadı. Bul baǵdarda xalıq ushın qolaylı huqıqıy hám sociallıq sharayatlar jaratıw, miynet migrantlarınıń huqıqların qorǵaw, olardı sırt elde múnásip jumıs penen támiyinlew jáne qaytıp kelgen puqaralardı jumısqa jaylastırıw boyınsha sistemalı jumıslar ámelge asırılmaqta.

Sonıń menen birge, xalıqaralıq shólkemler menen birgelikte migraciya processlerin tártipke salıw, maman kadrlar tayarlaw hám xalıqtı nızamlı migraciya imkaniyatları haqqında xabardar etiw nátiyjesinde elimizde bul tarawdıń zamanagóy sisteması qáliplestirilmekte.
Xosh, bul baǵdarda Sırtqı isler ministrligi tárepinen qanday jumıslar alıp barılmaqta? Bul soraw boyınsha ministrliktiń baspasóz xatkeri Ahror Burxonov ÓzAnıń xabarshısına intervyu berdi:
– “Pasport Ózbekstan Respublikası múlki esaplanadı. Bul pasporttıń iyesi Ózbektan Respublikası qorǵawında bolıp esaplanadı”.
Sonday-aq, túrli sebeplerge bola sırt elde bolıp turǵan watanlaslarımızdı qollap-quwatlaw, olardıń nızamlı huqıqları menen máplerin hár tárepleme qorǵaw ayrıqsha itibarda.
Ózbekstan Prezidentiniń “Sırt elde miynet etiwdi ámelge asırıw processlerin tártipke salıw boyınsha qosımsha ilajlar haqqında”ǵı qararına muwapıq, Sırtqı isler ministrligi juwapker uyımlar menen birgelikte puqaralarımızdıń sırt elde miynet etiwi ushın múnásip sharayatlar hám imkaniyatlardı keńeytiw maqsetinde xalıqaralıq birge islesiwdi jedel rawajlandırmaqta.
Bul baǵdarda mámleketimizdiń sırt eldegi diplomatiyalıq wákilxanaları watanlaslarımızdı jumıs penen támiyinlew ushın jańa baǵdarlardı tabıw boyınsha sistemalı jumıslar alıp barmaqta. Sonıń ishinde, jumıs beriwshiler hám jergilikli hákimiyat wákilleri menen turaqlı túrde nátiyjeli sóylesiwler ótkerilmekte, xalıqaralıq miynet bazarı turaqlı tallanıp, puqaralarımız benen ornatılǵan baylanıslar turaqlı keńeymekte.
Konsullıq xızmetler sheńberinde watanlaslarımızdıń zárúr hújjetleri jedellik penen rásmiylestirilmekte, olardıń huqıqları qorǵalmaqta hám júzege keletuǵın mashqalalar qabıl etiwshi mámleketiniń tiyisli uyımları menen birgelikte imkanı bolǵanınsha jedellik penen sheshilmekte. Bul bolsa migraciya procesiniń jáne de qáwipsiz hám tártipli bolıwın támiyinleydi.
Usı jerde, ayırım sanlarǵa toqtap ótemiz. Búgingi kúnde Ózbekstan xalqınıń derlik 60 procentin miynetke jaramlı jastaǵılar quraydı. Bul úlken jumısshı kúshi mámleket ekonomikası ushın áhmiyetli resurs, sonday-aq, xalıqaralıq miynet bazarı ushın da úlken potencial bolıp esaplanadı. Joqarı demografiyalıq ósimdi esapqa alǵan halda, miynet migraciyası baǵdarlamaların rawajlandırıw xalıqtıń bántligi hám dáramatları dárejesin arttırıwdıń tiykarǵı baǵdarlarınan birine aylanbaqta.
Ótken altı ayda potencialı joqarı sırt el jumıs beriwshileri, rekruting agentlikleri hám isbilermen toparlardıń wákilleri menen 366 dan aslam sóylesiwler ótkerilip, puqaralarımız ushın 97 mıńnan aslam jańa jumıs orınları jaratıldı. Bunnan tısqarı, mámleketimizge 53 ten aslam sırt el kompaniyası wákilleriniń kelgenligi Ózbekstan menen birge islesiwge qızıǵıwshılıq artıp atırǵanınan dárek beredi.
Sırt ellerdiń wákillikli uyımları hám shólkemleri menen 80 nen aslam ushırasıwlar shólkemlestirildi. Sırt elde miynet etip atırǵan watanlaslar menen 50 den aslam dógerek sáwbetleri ótkerildi.
Miynet migraciyasın huqıqıy tártipke salıw maqsetinde 22 húkimetleraralıq kelisim joybarları tayarlandı. Atap aytqanda, Kuveyt, Franciya hám Italiya menen 3 kelisimge qol qoyıldı hám olar tolıq kúshke kirdi. Sonday-aq, 13 kelisim sırt el tárepleri menen kelisiw ushın jiberilgen.
Miynet migraciyası tarawındaǵı birge islesiw geografiyası keńeyip barmaqta. Burın Ózbekstan puqaraların jumıs penen támiyinlewdiń tiykarǵı baǵdarları Rossiya, Qubla Koreya hám Germaniya bolǵan bolsa, házirgi waqıtta olardıń qatarına Avstriya, Ullı Britaniya, Arab qoltıǵı mámleketleri, Polsha, Franciya, Italiya hám basqa da rawajlanǵan mámleketlerdiń perspektivalı miynet bazarları qosıldı.
Sonıń menen birge, Sırtqı isler ministrligi sırt eldegi watanlaslarımızdı qáwipsiz hám nızamlı jumısqa jaylastırıw ushın qolaylı imkaniyatlar jaratıp, olardıń huqıqları menen mápleriniń qorǵalıwın bekkem támiyinlep kelmekte. Biraq bul process eki tárepleme, yaǵnıy mámleket tárepinen qollap-quwatlaw menen birge, hár bir watanlasımızdıń jeke juwapkershiligi de úlken áhmiyetke iye. Hár qıylı sebeplerge bola sırt elde qıyın jaǵdayǵa túsip qalǵan watanlaslarımız da bar hám mámleketimiz tárepinen 30-iyulden 30-avgustqa shekem “Watanǵa qaytarıw” gumanitarlıq akciyası ótkerilip, onıń sheńberinde AQSh, Rossiya, Túrkiya, Polsha hám basqa da mámleketlerden júzlegen puqaralar Ózbekstanǵa qaytarılmaqta.
Dúnyanıń qaysı múyeshinde bolıwına qaramastan, Ózbekstannıń hár bir puqarası mámlekettiń itibarında. Solay eken, usı eldiń perzenti, puqarası sıpatında biz de umıtpayıq: sırt elde bolıp atırǵan hár bir puqaranıń is-háreketi tikkeley elimizdiń ulıwma kelbetine tásir etedi. Sebebi, hár birimiz Ózbekstannıń bir wákilimiz hám soǵan múnásip bolayıq!

ÓzA xabarshısı
Nasiba Ziyodullaeva jazıp aldı.