Házirgi waqıtta Ózbekstan hám Qıtay arasında strategiyalıq sheriklik qatnasıqları rawajlanıp, ekonomikalıq, mádeniy hám diplomatiyalıq tarawlarda jedel baylanıslar jolǵa qoyılǵan. Qıtay – Ózbekstannıń eń iri sawda sheriklerinen biri bolıp, energetika, transport hám awıl xojalıǵı sıyaqlı baǵdarlarda birge islesiw barǵan sayın keńeymekte. Sonıń menen birge, mádeniy baylanıslar da bekkemlenip barmaqta. Bunıń ayqın dálili sıpatında Ózbekstan puqaralarınıń Qıtayǵa saparları sanınıń keskin artqanın kórsetiw múmkin.

Milliy statistika komitetiniń maǵlıwmatlarına bola, 2025-jıldıń birinshi yarımında 14,6 mıń Ózbekstan puqarası turistlik maqsetlerde sapar etken. Bul kórsetkish ótken jılǵı statistikaǵa salıstırǵanda 6,9 mıńǵa yamasa 88,5 procentke artqan.
2025-jıldıń birinshi yarımında Qıtayǵa sapar etken Ózbekstan puqaraları tómendegi maqsetler boyınsha bólistirilgen: sapar – 11 mıń 390 adam, tuwısqanların kóriw – 2 mıń 89 adam, xızmet babında – 595 adam, bilimlendiriw – 521 adam, emleniw ushın 23 adam.
Bul sanlar turizmniń eń jetekshi maqset bolıp qalıp atırǵanın kórsetpekte. Ásirese, Qıtaydıń tariyxıy estelikleri, zamanagóy qalaları hám tábiyǵıy gózzallıqları ózbekstanlı turistlerdi barǵan sayın kóbirek tartpaqta. Sonday-aq, tuwısqanlardı kóriw boyınsha saparlar sanınıń joqarılıǵı Qıtayda jasaytuǵın yamasa islep atırǵan ózbekstanlılar sanınıń artıp baratırǵanınan derek beredi.
Ózbekstan hám Qıtay arasındaǵı qatnasıqlardıń keńeyip baratırǵanı puqaralar háreketinde de ayqın kózge taslanbaqta. 2025-jıldıń birinshi yarımında Qıtayǵa barǵan ózbekstanlılar sanınıń derlik eki esege artqanı – bul eki mámleket arasındaǵı birge islesiwdiń tereńlesip atırǵanın kórsetedi.

Dildora DWSMATOVA,
ÓzA