Qaraqalpaqstan Respublikası Bajıxana basqarması baslıǵınıń orınbasarı M.Maxmadaliev bajıxana uyımları tárepinen atalıqqa alınǵan Nókis qalasındaǵı mayıplıǵı bolǵan hayal-qızlar “Múriwbet” internat úyinde bolıp, tárbiyalanıwshılar ushın múnásip sharayat jaratıw baǵdarında ámelge asırılıp atırǵan jumıslar menen tanıstı.

Mayıplıǵı bolǵan 250 hayal-qız qáwenderlikke alınǵan bul mákemede jaratılǵan sharayatlar, nawqaslar ushın shólkemlestirilgen dógereklerdiń jumısı menen tanısqan juwapkerler usı jerde jasaytuǵın hayal-qızlardıń qol miynetinen dóretilgen haqıyqıy kórkem óner shıǵarması dárejesindegi buyımlardı tamashalap, tań qalǵanın jasırmadı.
Dógereklerde shuǵıllanıp atırǵan tárbiyalanıwshılar menen shın kewilden qurılǵan sáwbetlesiw, olardıń kewlin biraz bolsa da kóterdi.
Usı jerdiń ózinde tárbiyalanıwshılar arasında salamat turmıs tárizin úgit-násiyatlaw maqsetinde sporttıń shaxmat hám shashka túrleri boyınsha sport jarısları ótkerildi.
Onda tárbiyalanıwshılar úlken qızıǵıwshılıq penen belsene qatnastı.
Qızǵın bellesiwlerge bay bolǵan sport jarıslarınıń juwmaǵında jeńimpazlar hám sıylı orın iyeleri anıqlanıp, estelik sawǵaları tapsırıldı.
Bunday ilajlardıń ótkeriliwi “Múriwbet” úyi tárbiyalanıwshılarınıń bos waqıtların mazmunlı ótkeriw, olardıń salamatlıǵın bekkemlew hám óz-ara doslıq hám awızbirshilik ortalıǵın jaratıwǵa xızmet etedi.

Qaraqalpaqstan xabar agentligi