Qıtaydıń Xunan provinciyası vice-gubernatorı Van Junshou basshılıǵındaǵı delegaciya Ózbekstanǵa keldi. Sapar dawamında Zoomlion Agriculture Machinery Co., Ltd. (Qıtay) hám “Oxus Machinery” kompaniyalar toparı (Ózbekstan) arasında texnologiyalıq birge islesiw haqqındaǵı kelisimge qol qoyıldı jáne Zoomlion traktorların mámlekette lokalizaciyalaw baǵdarlamasınıń úshinshi basqıshı saltanatlı túrde ashıldı.

Óndiris procesi ushın platforma sıpatında “Profmetservice” JShJ tańlandı. Bul kárxana “Oxus Machinery”toparına qaraslı kompaniyalardan biri bolıp esaplanadı.
Birge islesiwshiler óndiristi jergilikli fermerlerdiń talapları, Ózbekstannıń topıraq-klimat sharayatları hám agrotexnologiyaların esapqa alǵan halda jolǵa qoymaqta.
Baǵdarlama sheńberinde 2024-jılı mámleket boylap keń kólemli xojalıq sınaqları ótkerilgen. Bul sınaqlar qaysı túrdegi traktorlar awıl xojalıǵı ushın eń maqul ekenin anıqlaw, olardıń texnikalıq konfiguraciyasın islep shıǵıw hám isenimliligin tekseriwge qaratılǵan edi. Nátiyjeler boyınsha hár qıylı agrotexnologiyalıq processlerge sáykes keletuǵın quwatlılıq qatarı, modeller hám konfiguraciyalar tańlap alındı.
2025-jıldıń birinshi shereginde baǵdarlama islep shıǵarıw basqıshına ótti. Usı dáwirde 11100 at kúshine, 160 at kúshine hám 2040 at kúshine iye bolǵan úsh modeldiń dáslepki partiyası islep shıǵarıldı.
Házirgi – úshinshi basqısh bolsa traktorlardı tereń lokalizaciyalawdı názerde tutadı. Bul processte dvigatel, transmissiya, kabina karkası hám elementleri, gidravlika, elektr hám pnevmatika sistemaları sıyaqlı tiykarǵı agregat hám komplektlewshi bólekler jergilikli kárxanalar menen birgelikte islep shıǵarıladı.
2025-jıldıń avgust ayınıń aqırına shekem Zoomlion RS 1604 (160 at kúshi) traktorınıń birinshi nusqası islep shıǵarılıwı rejelestirilgen. Sonday-aq, jıl aqırına shekem jáne eki model – Zoomlion RC 804 (80 at kúshi) hám Zoomlion RG 2004 (200 at kúshi) islep shıǵarıwǵa kirgiziliwi kútilmekte.
Zavodtıń jıllıq óndirislik quwatlılıǵı 1 000 dana traktordı quraydı. Óndiris procesi Zoomlion kompaniyası usınǵan texnologiyalar hám sapa qadaǵalawı tiykarında alıp barıladı.
Sonıń menen birge, texnika satılǵannan keyingi xızmet kórsetiw de jolǵa qoyıladı. “Oxus Machinery” JShJ mámleket boylap keń tarmaq arqalı kepillikli ońlaw, texnikalıq xızmet kórsetiw hám awısıq bólekler támiynatın ámelge asıradı.

ÓzA