21-avgust kúni Milliy baspasóz orayında “Biznesti rawajlandırıw banki” AKB Málimleme xızmetiniń baslıǵı Shuhrat Oripovtıń qatnasıwında brifing bolıp ótti.

Onda bul qarjı mákemesi elimizde xalıqtı turaq jay menen támiyinlew, puqaralardıń jasaw sharayatların jaqsılaw maqsetinde ámelge asırılıp atırǵan keń kólemli mámleketlik baǵdarlamalarda belsene qatnasıp atırǵanı atap ótildi.
Atap aytqanda, bankte turaq jay satıp alıw, qurıw, rekonstrukciyalaw hám ońlaw maqsetleri ushın 10 nan aslam kredit ónimleri engizilgen.
2025-jıldıń 7 ayında bank tárepinen barlıq dárekler esabınan 4 596 puqaraǵa 1 trillion 273 milliard sum muǵdarında ipoteka krediti ajıratılǵan.
Sonıń ishinde, Ekonomika hám qarjı ministrliginiń qarjıları esabınan baslanǵısh turaq jay bazarındaǵı kvartiralar satıp alıw, turaq jay qurıw (rekonstrukciyalaw) ushın – 3 709 puqaraǵa 1 trln 41 mlrd sum ajıratıldı. Sonnan 1 841 puqaraǵa 545 mlrd sumlıq ipoteka kreditleri subsidiya tólemleri tiykarında berildi.
Ótken dáwirde bank tárepinen:
– “Qishloq qurilish invest” Injiniring kompaniyası qatnasıwında úlgili turaq jaylar ushın – 367 puqaraǵa 52 mlrd sumlıq;
– banktiń óz qarjıları esabınan ekilemshi bazardan turaq jay satıp alıw, turaq jay ońlaw, qurıw hám rekonstrukciyalaw ushın – 501 puqaraǵa 174,2 mlrd. sumlıq ipoteka kreditleri ajıratıldı.
Ámelge asırılıp atırǵan jumıslardıń nátiyjesinde ótken jıldıń usı dáwirine salıstırǵanda bank tárepinen xalıqqa ajıratılǵan ipoteka kreditleriniń salmaǵı 941 milliard sumǵa yamasa 383 procentke arttı.
Brifingte atap ótiliwinshe, “Biznesti rawajlandırıw banki”nde xalıqqa ipoteka kreditin ajıratıwda bir qatar qolaylıqlar engizilgen.
Atap aytqanda, rásmiy dáramatqa iye bolmaǵan shaxslarǵa olardıń Humo hám Uzcard bank kartalarınıń aylanısı maǵlıwmatları tiykarında ipoteka kreditin ajıratıw mexanizmi engizilgen.
Xalıqtıń turaq jayların energiya únemlewshi hám ekologiyalıq taza ónimlerden paydalanǵan halda ońlawı ushın “Jasıl ońlaw” ipoteka kreditiniń ónimi engizildi.
Bunnan tısqarı, ipoteka krediti ajıratılıwında bank mobil qosımshası arqalı onlayn arza jiberiw imkaniyatı jaratılǵan.

Bank Málimleme xızmeti