Ózbekstan Xalıqaralıq mamanlıqlar hám bahalaw orayı (XMBO) direktorı Husnidin Hamidov hám Ullı Britaniya Milliy málimleme orayı (UK ENIC) basshısı Ketrin Xuan arasında onlayn sóylesiwler shólkemlestirildi, dep xabar bermekte “Dunyo” MA.

Ushırasıwda britaniyalı qánigelerge XMBOnıń maqset hám wazıypaları, sonday-aq, oraydıń Ullı Britaniyanıń “Integrated Qualifications Framework” sisteması menen birgelikte ámelge asırıp atırǵan joybarları haqqında maǵlıwmat berildi. Atap aytqanda, Ózbekstanda akademiyalıq hám kásiplik baǵdarlamalardı integraciyalaw, studentler ushın xalıqaralıq bilimlendiriw imkaniyatların keńeytiw, akademiyalıq mobillikti támiyinlew baǵdarındaǵı jumıslar atap ótildi.
Tárepler XMBO tárepinen islep shıǵılǵan hám Ózbekstan milliy bilimlendiriw sistemasında tán alınǵan 3-7 dárejeli akademiyalıq hám kásiplik baǵdarlamalardıń Ullı Britaniya nızamshılıǵı sheńberinde de rásmiy tán alınıwı máselesin dodaladı.
Britaniya tárepi bul baǵdarlamalardıń rásmiy tán alınıwı Ózbekstan studentleri ushın qosımsha imkaniyatlar jaratatuǵının málim etti. Bul bolsa studentlerge bilimlendiriwdi hám Ózbekstanda, hám Britaniyada alıw imkaniyatın beredi.
Ushırasıw juwmaǵında Xalıqaralıq qánigelikler hám bahalaw orayı tárepinen UK ENICke Britaniya bilimlendiriw sisteması menen Ózbekstan milliy bilimlendiriw sisteması arasındaǵı muwapıqlıqtı óz-ara tán alıw boyınsha tolıq maǵlıwmat hám usınıslardı beriw jáne jumısshı sóylesiwlerdi ekspertler dárejesinde dawam ettiriw boyınsha kelisimge erisildi.
UK ENIC Ullı Britaniya húkimeti janındaǵı xalıqaralıq tájiriybeler hám kónlikpelerdi tán alıw hám salıstırıw boyınsha rásmiy uyım esaplanadı. Shólkem Bilimlendiriw ministrligi menen birgelikte sırt el diplomları hám qánigeliklerin tán alıw boyınsha málimleme hám másláhát járdemin kórsetip kelmekte», delinedi xabarda.

Qaraqalpaqstan xabar agentligi