Prezident Shavkat Mirziyoev sud sistemasın jetilistiriwge hám ádil sudlaw máselelerine baylanıslı perezentaciya menen tanıstı.

Sońǵı jıllarda bul taraw izbe-iz reformalanıp, sudlar jazalawshı uyımnan insan huqıqların qorǵawshı sistemaǵa aylandırıldı.
Sonıń ishinde, hákimshilik sudlar shólkemlestirildi. Turmıslıq zorlıq-zombılıqtıń aldın alıwǵa qaratılǵan nátiyjeli ilajlar kórildi. Shańaraqlıq máselelerge qánigelesken sudyalar korpusı jaratıldı. Investiciyalıq kelispewshilikler boyınsha ayrıqsha sudlaw quramı shólkemlestirildi.
Bunday reformalardı puqaralar óz waqtında sezbekte, sırt el ekspertleri áhmiyetli qádem sıpatında tán alınbaqta.
Sonıń menen birge, sudlawdıń ashıqlıǵın hám xalıqshılıǵın támiyinlew, sanlastırıw arqalı adamlarǵa qolaylılıq jaratıw, joqarı maman kadrlar tayarlaw boyınsha kóp máseleler óz sheshimin kútpekte.
Prezentaciyada bul baǵdardaǵı rejeler hám olardı ámelge asırıw ilajları dodalandı.
Ádil sudlaw tarawın sanlastırıw maqsetinde rawajlanǵan mámleketlerdiń tájiriybesi tiykarında «Sanlı sud» koncepciyası islep shıǵıldı hám onı izbe-iz ámelge asırıw boyınsha ilajlar belgilendi. Bul korrupciyanıń aldın alıw, puqaralar hám isbilermenlerge áweregershiliksiz ádil sudlawǵa erisiw imkaniyatların keńeytiwge xızmet etedi.
Tallawlarǵa bola, puqaralıq hám ekonomikalıq sudlarda kóriletuǵın shaǵımlardıń úlken bólegi kelispewshiliksiz islerge tuwra kelmekte. Sonlıqtan bunday máselelerdi hákimshilik uyımlar wákilligine ótkeriw usınıs etilmekte. Bul puqaralar hám isbilermenlik subektleri mashqalaların qısqa múddette sheshiwdi támiyinleydi.
Jáne bir qolaylılıq – hákimshilik hám ekonomikalıq sud jumısların eksterritorial túrde kóriw tártibin engiziw. Búgingi sanlı texnologiyalar ásirinde onıń imkaniyatı bar.
Ádillik hám isenimdi támiyinlewde sudyalıq lawazımnıń turaqlılıǵı áhmiyetli. Usı maqsette sudyalıqqa tayınlaw múddetlerin qayta kórip shıǵıw názerde tutılmaqta.
Barlıq baǵdardaǵı sudlar boyınsha regionallıq tekskeriw sudların shólkemlestiriw, wálayat hám oǵan teńlestirilgen sudlardaǵı tekseriw instanciyaların saplastırıw usınısı bildirildi. Onda wálayat hám oǵan teńlestirilgen sudlarda tek ǵana apellyaciya hám kassaciya instanciyası bolıwı, tekseriw instanciyası bolsa 5 regionallıq sudta shólkemlestiriliwi rejelestirilmekte.
Jáne bir áhmiyetli másele – sud sisteması ushın kadrlar tayarlaw sistemasın túp-tiykarınan jetilistiriw bolıp esaplanadı. Sol maqsette Sudyalar joqarı mektebin reformalap, onıń negizinde Ádil sudlaw akademiyasın shólkemlestiriw koncepciyası tanıstırıldı.
Mámleketimiz basshısı bildirilgen usınıslardı maqullap, tiyisli pármanlarǵa qol qoydı. Rejelestirilgen wazıypalardıń orınlanıwın sistemalı hám sapalı támiyinlew boyınsha tapsırmalar berildi.

ÓzA