Ózbekstannıń Lixtenshteyn Knyazligindegi birinshi elshisi (rezidenciyası Berlin qalasında jaylasqan) etip tayınlanǵan Dilshod Axatov usı mámlekettiń Miyrasxor shahzadası Aloyzǵa isenim jarlıqların tapsırdı, dep xabar bermekte “Dunyo” MA.

«Lixtenshteyn Miyrasqor shaxzadası mámleketimizde ámelge asırılıp atırǵan reformalardı hám eki mámleket arasında baqlanıp atırǵan óz-ara paydalı baylanıslardı rawajlandırıw boyınsha háreketlerdi qollap-quwatladı.
Ol tariyxta birinshi márte usı mámlekette Ózbekstan elshisiniń tayınlanǵanın ayrıqsha atap ótti.
Lixtenshteyn hám Ózbekstan arasında 2024-jılı mart ayında ornatılǵan diplomatiyalıq baylanıslar birge islesiwdi sistemalı túrde dawam ettiriw ushın áhmiyetli tiykar bolǵanı, Vadus Tashkent penen qatnasıqlardı keńeytiw hám bekkemlew tárepdarı ekeni atap ótildi.
Ushırasıw juwmaǵında shaxzada Aloiz Ózbekstan Prezidentine jaqsı tilekleri hám qızǵın sálemlerin jollap, mámleketimiz xalqına tınıshlıq hám abadanlıq tiledi.
Sonday-aq, Ózbekstan delegaciyası Lixtenshteyn Bas ministriniń orınbasarı – sırtqı isler, qorshaǵan ortalıq hám mádeniyat ministri Sabine Monauni menen ushırasıw ótkerdi. Sóylesiw waqtında eki mámlekettiń BMSh hám basqa da xalıqaralıq shólkemler sheńberindegi konstruktivlik sóylesiwi joqarı bahalandı.
Ol Ózbekstan tárepinen ámelge asırılıp atırǵan tınıshlıq súyer, ashıq, ámeliy hám jedel sırtqı siyasattı ayrıqsha atap ótti. Sonıń menen birge, mámleketler arasındaǵı eki tárepleme hám kóp tárepleme birge islesiwdi bunnan bılay da rawajlandırıwǵa úlken imkaniyatlar bar ekenligi atap ótildi.
Atap aytqanda, Sabine Monauni Xalıqaralıq valyuta fondındaǵı Shveycariya dawıs beriw toparı sheńberindegi nátiyjeli birge islesiwdi joqarı bahalap, Lixtenshteynniń 2024-jıl oktyabrde bul toparǵa aǵza bolıwı eki mámleket arasındaǵı ekonomikalıq hám finanslıq tarawlardaǵı birge islesiwdi jáne de bekkemlewge xızmet etetuǵınına isenim bildirdi», delinedi xabarda.

Qaraqalpaqstan xabar agentligi