«Nókis-aeroport» shegara bajıxana postında huqıqbuzarlıqlarǵa qarsı gúresiw boyınsha gezektegi ilaj shólkemlestirilip, onda xalıqaralıq reysler boyınsha post arqalı háreketlenip atırǵan puqaralarǵa bajıxana nızamshılıǵı tártip-qaǵıydaları túsindirilip, olarǵa hár qanday jaǵdayda qatań ámel etiw zárúr ekenligi atap ótildi.

Ilaj dawamında post xızmetkerleri bajıxana shegaraları arqalı alıp ótiliwi qadaǵan etilgen tovarlardıń dizimi, tovar-materiallıq baylıqlardı bajısız alıp ótiw normalarına ayrıqsha toqtap ótip, puqaralarǵa bajıxana nızamshılıǵın bilip yamasa bilqastan buzıwǵa urınbaw, qadaǵan etilgen zatlardı bajıxana shegaraları arqalı alıp ótpew hám belgilengen normaǵa ámel etiw boyınsha túsindiriw jumısların alıp bardı.
Nızamshılıq talapların bilmew juwapkershilikten azat etpeytuǵının hám islengen huqıqbuzarlıqtı jasırıw maqsetinde bajıxana xızmetkerine “para” usınıs etiw nızamshılıq talapları tiykarında juwapkershilikke tartıwǵa tiykar bolatuǵının atap ótiw kerek.
Solay eken, ekonomikanıń hám jámiyettiń rawajlanıwına unamsız tásir kórsetiwshi faktor – korrupciyaǵa qarsı gúresiw – hár bir puqaranıń wazıypası. Puqaralardıń huqıqıy bilimlerin arttırıw, olardı bajıxana nızamshılıǵı menen tanıstırıw korrupciya hám huqıqbuzarlıqlardıń aldın alıwda ayrıqsha áhmiyetke iye.
Ilaj sońında puqaralarǵa bajıxana xızmetkeriniń dámegóylik, lawazımnan shıǵıw, “para” talap etiw sıyaqlı qolaysız háreketlerine dus kelse, Bajıxana komitetiniń 11-08 qısqa hám Qaraqalpaqstan Respublikası Bajıxana basqarmasınıń (61) 224-90-86 isenim telefon nomerlerine qońıraw etiwi soralıp, arnawlı bukletler tarqatıldı.

Qaraqalpaqstan xabar agentligi