Senattıń Ilim, bilimlendiriw hám densawlıqtı saqlaw máseleleri komitetiniń májilisinde “Mámleketlik sociallıq qamsızlandırıw haqqında”ǵı nızam boyınsha komitettiń juwmaǵın tastıyıqlaw máselesi kórip shıǵıldı.

Nızam xalıqtıń sociallıq qorǵalıwın bunnan bılay da kúsheytiw maqsetinde islep shıǵılǵanı atap ótildi. Onda mámleketlik sociallıq qamsızlandırıwdıń ámel etiwi, qamsızlandırıw hádiysesi, qamsızlandırılǵan shaxstıń, qamsızlandırıwshınıń, qamsızlandırılıwshınıń huqıq hám minnetlemeleri bekkemlengen.
Nızamda mámleketlik sociallıq qamsızlandırıw qarjılarınıń derekleri, qamsızlandırıw tólemi stavkası, qamsızlandırıw tólemlerin tólewshiler, mámleketlik sociallıq qamsızlandırıwdıń finanslıq turaqlılıǵınıń mámleketlik kepillikleri, mámleketlik sociallıq qamsızlandırıw boyınsha tólemlerdi tayınlaw hám ámelge asırıw sıyaqlı bir qatar máseleler názerde tutılǵan.
Komitet aǵzaları hám ekspertler tárepinen bul nızamnıń ayırım normaların qayta kórip shıǵıw hám ámeldegi nızamshılıq hújjetlerine muwapıqlastırıw zárúr ekenligine itibar qaratıldı.
Hújjette wákillikli uyımnıń wákillikleri hám wazıypaları ashıp berilmegeni, sociallıq kepillikler jeterli dárejede belgilenbegeni, qamsızlandırıw tólemi stavkası, qamsızlandırıw tólemin esaplaw múddetleri hám tártibi, qamsızlandırıw tólemin tólew boyınsha keshiktiriw (bólip-bólip tólew) imkaniyatın beriw tártibi, mámleketlik sociallıq qamsızlandırıw boyınsha tólemlerdiń muǵdarları hám dáwirleri sáwlelendirilmegeni atap ótildi.
Dodalawlar juwmaǵında bul nızamdı qayta kórip shıǵıw zárúr ekenligi haqqındaǵı juwmaqtı Senat kengashine kirgiziw boyınsha komitet qararı qabıl etildi.
Májiliste “Sociallıq jumıs haqqında”ǵı nızam da dodalandı. Nızamnıń maqseti sociallıq jumıs tarawındaǵı qatnasıqlardı tártipke salıwdan ibarat ekenine ayrıqsha itibar qaratıldı.
Nızamda sociallıq jumıs tarawındaǵı tiykarǵı túsinikler sáwlelendirilgen bolıp, sociallıq jumıs tarawınıń tiykarǵı principleri, sociallıq jumıstı shólkemlestiriw, sociallıq jumıs tarawın tártipke salıw, sociallıq xızmetler hám sociallıq járdem tarawındaǵı mámleketlik qadaǵalaw, sociallıq xızmetkerdiń minnetlemeleri, sociallıq xızmetker jumısınıń kepillikleri belgilep berilip atırǵanı atap ótildi.
Májilis juwmaǵında nızam boyınsha mápdar ministrlikler hám uyımlar jáne ekspertlerdiń usınısları tıńlandı. Tolıq úyreniwlerden soń komitettiń tiyisli qararı qabıl etildi.

N.Abduraimova,
ÓzA