Bıyılǵı “Baslamalı byudjet”tiń 2-máwsimine 15-iyul kúninen start berilip, 3-avgust kúnine shekem usınıs beriw basqıshı juwmaqlandı. 4-18-avgust kúnleri saylap alıw basqıshı bolıp ótti. 3 kúnlik úgit-násiyatlaw basqıshınan soń, 22-avgusttan dawıs beriw basqıshına start beriledi.

Gezektegi qızǵın basqısh hám usınıs etilip atırǵan joybarlar, ajıratılıp atırǵan qarjı hám eń áhmiyetlisi bul processlerdiń barısı haqqında Ekonomika hám qarjı ministrliginiń jetekshi qánigesi Uluǵbek CHoriev penen sáwbetlestik.
– “Baslamalı byudjet”tiń áhmiyetli basqıshı bolǵan dawıs beriwde puqaralarımız qaysı táreplerge itibar qaratıwı kerek?
– 15-iyulden baslanǵan “Baslamalı byudjet”tiń ekinshi máwsiminde respublika boyınsha 22 263 joybar puqaralar tárepinen portalǵa kelip tústi. Házirde olardı saylap alıw basqıshı juwmaqlandı. Yaǵnıy, rayon-qalalarda shólkemlestirilgen jumısshı komissiya tárepinen barlıq kelip túsken joybarlar tańlap alıw basqıshınan ótkerildi. Oliy Majlis Senatı tárepinen tastıyıqlanǵan Rejege bola belgilengen normalar tiykarında joybarlar tańlap alındı.
22 263 joybar ishinen 18 mıńnan aslamı keyingi dawıs beriw basqıshına ótkerildi. Házirgi waqıtta úgit-násiyatlaw basqıshı dawam etpekte. Yaǵnıy, intakerler tárepinen “biz dawıs beriw basqıshına óttik, dawıs jıynaymız,” dep óziniń máhállesi, qońsı-qobaları, tuwısqanları arasında úgit-násiyatlaydı.
Dawıs beriw procesi 10 kún dawamında ótkeriledi. 22-avgusttan 31-avgustqa shekem ótkeriliwi rejelestirilgen.

ÓzA