Astana qalasında “Ulıwma tariyxıy-mádeniy miyras – birge islesiwdiń jańa gorizontları” atamasında Ózbekstan hám Qazaqstan ilimiy-dóretiwshi zıyalılarınıń birinshi forumı bolıp ótti. Onda Ózbekstan parlamenti delegaciyası da qatnastı.
Ilajda shıǵıp sóylegen Ózbekstan Respublikası Oliy Majlisi Senatınıń Baslıǵı Tanzila Narboeva Ózbekstan hám Qazaqstandı tek ǵana ulıwmalıq mápler emes, al tereń tariyxıy, mádeniy hám ruwxıy tamırlar baylanıstırıp turǵanın atap ótti.
Mámleket basshıları – Shavkat Mirziyoev hám Qasım-Jomart Toqaevtıń siyasiy erk-ıqrarı hám is-háreketleri sebepli eki mámleket arasındaǵı doslıq qatnasıqlar, sonıń ishinde, gumanitarlıq hám mádeniy baylanıslar barǵan sayın bekkemlenbekte.
Forumda ullı oyshıllar, shayır hám ilimpazlar, filosoflardıń miyrasın qásterlep saqlaw hám úgit-násiyatlaw máselelerine ayrıqsha itibar qaratıldı. Atap aytqanda, Astana qalasında Áliysher Nawayıǵa, Tashkentte bolsa Abay Qunanbaevqa estelikler ornatılǵan. Ózbekstanda Abay tuwılǵan kúniniń 180 jıllıǵına baǵıshlanǵan eslew ilajlarınıń ótkerilgeni eki mámleket birge islesiwiniń ayqın úlgisi bolıp esaplanadı.
Ilim hám bilimlendiriw tarawındaǵı birge islesiwdi rawajlandırıw máselesi de dodalandı. Búgingi kúnge shekem Ózbekstan hám Qazaqstan joqarı bilimlendiriw mákemeleri arasında 280 nen aslam shártnama hám memorandumǵa qol qoyılǵan. Birgeliktegi bilimlendiriw baǵdarlamaları jolǵa qoyılǵan.
Bilimlendiriw kúnleri hám universitet yarmarkaları ótkerilmekte. Ózbekstanda qazaq tilinde qánigeler tayarlanadı hám 400 den aslam mektepte qazaq tili oqıtıladı.
Ózbekstan parlamenti mádeniy hám ilimiy birge islesiwge qaratılǵan birgeliktegi baslamalardı qollap-quwatlaytuǵını, bul baǵdarda zárúr nızamshılıq hám shólkemlestiriwshilik sharayatlar jaratılatuǵını atap ótildi.
Qatnasıwshılar jańa sharayatlarda mádeniy turizm hám kreativ industriyanı rawajlandırıw, jaslardı jedel tartqan halda festivallar, kórgizbeler, kinoforumlar hám basqa da gumanitarlıq ilajlardı ótkeriw úlken áhmiyetke iye ekenin atap ótti.
Forum Ózbekstan hám Qazaqstan arasında gumanitarlıq baylanıslardı bekkemlew, jańa joybarlardı dodalaw hám eki mámleket zıyalıları arasında pikir alısıw ushın áhmiyetli minberge aylandı.
Forum sheńberinde eki xalıqtıń ullı shayırları, xudojnikleri hám ilimpazlarınıń ilimiy hám dóretiwshilik miyrasınan úlgiler kórgizbesi shólkemlestirildi. Ózbek avtorları tárepinen tayarlanǵan tariyxqa baylanıslı kitaplardıń prezentaciyası ótkerildi.

Norgul ABDURAIMOVA,
ÓzAnıń xabarshısı