Elimizde Prezidentimizdiń basshılıǵında ámelge asırılıp atırǵan “Insan qádiri ushın” principi tiykarındaǵı reformalar hár bir aymaqta óz nátiyjesin kórsetpekte. Bul processte jámiyettiń itibar hám ǵamxorlıqqa mútáj qatlamı – ata-anasınan erte ayırılǵan jaslarǵa ayrıqsha itibar qaratılmaqta. Olardıń materiallıq hám ruwxıy támiynatı, bilim alıwı, kásip iyelewi, jumıs hám turaq jay menen támiyinleniwi sıyaqlı máseleler mámleket moynına alınǵan.

Usı maqsette 2025-jıl dawamında Beruniy rayonında 8 ata-ana qaramaǵınan ayırılǵan jaslardı turaq jay menen támiyinlew belgilengen. Búgin rayonda jáne bir jasqa mámleket ǵamqorlıǵınıń ámeliy kórinisi sıpatında bir xanalı, barlıq qolaylıqlarǵa iye turaq jay tapsırıldı, – dep maǵlıwmat beredi rayon hákimligi Málimleme xızmeti bólimi.
Insan sociallıq xızmetler orayı Beruniy rayonı bólimi tárepinen Suxrob Yuldashevqa Toqimachi máhállesinde berilgen bul kvartira, bayram aldınan onıń ushın úlken sawǵa boldı. Házir studentlik dáwirin basınan ótkerip atırǵan, ilim tarawında joqarı sheklerdi gózlep atırǵan S.Yuldashev keleshekte óz qánigeligi boyınsha jetik kadr sıpatında elimizge xızmet etiw tilegin bildirdi.
– Maǵan Prezidentimizdiń tapsırması menen 1 bólmeli jay tapsırıldı hám men bunnan oǵada quwanıshlıman. Kórsetilgen ǵamxorlıq ushın minnetdarshılıq bildiremen. Men ushın bul bayram aldınan úlken sawǵa boldı, – deydi ol.
Mámleketimiz tárepinen ámelge asırılıp atırǵan bunday iygilikli jumıslar, álbette, hár bir jastıń kewlinde úmit hám isenim oyatadı, keleshekke isenim menen umtılıwǵa ruwxlandıradı.

Qaraqalpaqstan xabar agentligi