Múnásibet

Ǵárezsizlik – hár bir millet ushın eń ullı hám eń áziz jemis. Usı kúnlerde xalqımız ushın ullı bayram – Ózbekstan Respublikası mámleketlik ǵárezsizliginiń 34 jıllıǵı keńnen belgilenip atır. Aradan ótken tariyxıy dáwir dawamında Watanımız pútkilley jańasha kóriniske iye boldı, xalqımız árman etken erkin hám abadan turmıs tiykarı jaratıldı.
Hár bir kúndi jańalıqlar, jańalanıwlar menen kútip alıp atırǵan watanlaslarımız ullı bayram – Ǵárezsizlik bayramın múnásip kútip almaqta. Bunıń ózine tán sebebi bar, álbette. Ótken jıllar dawamında ámelge asırılǵan úlken reformalardıń nátiyjesi mámleketimizdiń rawajlanıwı hám xalqımızdıń turmıs tárizinde óz kórinisin tappaqta.
Ullı bayramımız “Watan ushın, millet ushın, xalıq ushın!” degen iygilikli ideyanı ózinde jámlegen halda, xalqımızdıń bir maqset jolında birleskenin jáne bir márte kórsetip, bul processlerde elimizde alıp barılıp atırǵan keń kólemli reformalar, jaratılǵan imkaniyat hám sharayatlar óziniń unamlı nátiyjesin bermekte.
Eń tiykarǵısı, zamanlaslarımızdıń qálbinde watanǵa sadıqlıq, xalqımızǵa mehir hám millettiń rawajlanıwı ushın juwapkershilik sezimi jáne de kúsheyip, erteńgi kúnge isenim hám maqtanısh sezimi bekkemlenbekte.
Sońǵı jıllarda Prezidentimizdiń basshılıǵında ámelge asırılıp atırǵan keń kólemli reformalardıń nátiyjesi, bárinen burın, hár bir watanlasımızdıń turmısında sáwlelenip, turaq jaylar, jollar, mektep hám emlewxanalardıń qurılısı, zamanagóy infrastrukturalardıń jaratılıwı xalqımızdıń turmıs dárejesin arttırıwǵa xızmet etpekte.
Xalıqtı sociallıq qorǵaw, ónermentler, isbilermenler ushın imkaniyatlardıń kólemi keńeyip, jańa jumıs orınlarınıń jaratılıwı, awıl hám qalalar infrastrukturasınıń jańalanıwı – bulardıń barlıǵı ǵárezsizlik jıllarındaǵı reformalardıń ámeliy nátiyjesi bolıp esaplanadı.
Ótken jıllar dawamında Qaraqalpaqstan Respublikasınıń rawajlanıwı jolında bir qatar nızamlar hám normativlik-huqıqıy hújjetler qabıl etildi, olar arqalı ekonomikalıq rawajlanıw, sociallıq turaqlılıq hám xalıqtıń abadanlıǵın támiyinlew, sonday-aq, jaslar hám hayal-qızlardı qollap-quwatlaw, isbilermenlikti rawajlandırıw hám milliy qádiriyatlardı qásterlep-saqlaw jolında keń imkaniyatlar jaratıldı.
Ózbekstan Respublikası Prezidenti tárepinen 2025-jıl 14-avgust kúni qabıl etilgen “Qaraqalpaqstan Respublikasın sociallıq-ekonomikalıq rawajlandırıwǵa qaratılǵan ilajlardı bunnan bılay da jedellestiriw haqqında”ǵı qarar da elimiz turmısında áhmiyetli hújjetlerden biri boldı.
Bul hújjet Qaraqalpaqstan Respublikasında xalıqtıń abadanlıǵın arttırıw, turmıs sapasın jaqsılaw, jańa jumıs orınların jaratıw, isbilermenlikti rawajlandırıw hám sociallıq tarawlardı qollap-quwatlawda úlken áhmiyetke iye, sonday-aq, aymaqtı rawajlandırıwdıń jańa basqıshına alıp shıǵatuǵını sózsiz.
Qararda belgilengen wazıypalar hám ilajlar – tek ǵana aymaqtıń ekonomikalıq ósiwine xızmet etip qoymastan, al jaslardıń bilim alıw imkaniyatların keńeytiw hám kásip-ónerge úyretiw, sonday-aq, aymaqtıń infrastrukturalıq potencialın kúsheytiw hám turizmdi rawajlandırıwǵa qaratılǵanı menen de áhmiyetli.
Usı jaǵınan bul qarar óz gezeginde elimizde isbilermenlerdi qollap-quwatlaw, olardıń erkin jumıs alıp barıwına járdemlesiw menen birge, bar kemshiliklerdi nátiyjeli saplastırıw hám tarawdı jańa basqıshqa alıp shıǵıwda jáne bir áhmiyetli qádem bolıp, xalqımızdıń turmıs sapasın jaqsılawda, túrli tarawlarda unamlı ózgerislerdi ámelge asırıwda áhmiyetli qollanba bolıp xızmet etedi.
Búgin alıp barılıp atırǵan reformalardıń nátiyjesin hár bir tarawda sezip atırmız. Jańalanıw hám rawajlanıw jolında hár bir watanlasımız, ásirese, jaslarımız belsene qatnaspaqta.
Mámleketlik siyasattıń tiykarǵı baǵdarlarınan biri bolǵan bilimlendiriw tarawın rawajlandırıw hám jaslardı hár tárepleme qollap-quwatlaw baǵdarındaǵı jańa reformalar elimizdiń keleshektegi rawajlanıwı ushın bekkem tiykar jaratpaqta.
Sońǵı jılları elimizde zamanagóy qánigelestirilgen mektepler, joqarı bilimlendiriw mákemeleriniń sanı artıp barmaqta. Studentlerdiń sırt elde oqıwı hám tájiriybe arttırıwı ushın keń imkaniyatlar jaratıldı. Jaslar ushın stipendiyalar, grantlar hám joybarlar ámelge asırılmaqta. Sonday-aq, “Jaslar dápteri,” “Hayal-qızlar dápteri” sıyaqlı sistemalar arqalı jaslardıń bántligi támiyinlenbekte, olardıń óz talantın júzege shıǵarıwı ushın sharayatlar jaratılmaqta.
Imkaniyatlarǵa juwap retinde, jaslarımız juwapkershilikti tereń sezingen halda, ilimiy oylap tabıwlar jaratıp, sport hám mádeniyat jáne barlıq tarawlarda ózlerin joqarı dárejede kórsetpekte. Búgingi reformalardıń nátiyjesi xalqımız, ásirese, jaslarımız turmısında barǵan sayın ayqın kózge taslanıp, ǵárezsizlik bayramın jáne de saltanatlı hám mazmunlı etpekte.
Elimizde qurılıp atırǵan jańa infrastrukturalar, xalqımızdıń turmıs dárejesin arttırıwǵa qaratılǵan ilajlar hám eń áhmiyetlisi, insan qádirin ulıǵlawǵa qaratılǵan mámleketlik siyasat – bárshemizdiń qálbimizde Watanǵa bolǵan mehir hám maqtanısh sezimlerin jáne de kúsheytedi.
Ǵárezsizliktiń 34 jıllıǵı – xalqımızdıń awızbirshiligi, mártligi hám umtılısınıń jemisi. Búgingi rawajlanıwlar, jańa baslamalar hám keleshekke isenimli qádemler bárshemizge bir haqıyqattı uqtıradı: ǵárezsizlik – biybaha jemis, al reformalar onıń mazmun-mánisin bayıtıp, elimizdiń rawajlanıwına xızmet etpekte. Sonlıqtan, bul qutlı bayram bárshemizdi jáne de birlestirip, Jańa Ózbekstannıń rawajlanıw jolında úlken sheklerge erisiwine bekkem tiykar jaratadı.

Ruslan Djumamuratov,
Oliy Majlis Nızamshılıq palatasınıń deputatı.
Qaraqalpaqstan xabar agentligi