Prezident Shavkat Mirziyoevtiń isbilermenler menen ashıqtan-ashıq sóylesiwi dawam etpekte.

Dástúrge bola, bıyıl da kishi biznes wákillerinen baslap iri kárxanalardıń basshılarına shekem – eń aldıńǵı hám pidayı isbilermenlerden 49 ı mámleketlik sıylıqlar, 112 si bolsa “Faol tadbirkor” kókirek belgisi menen sıylıqlandı. Olardıń arasında ilimi menen biznestiń rawajlanıwına úlken úles qosıp atırǵan ilimpazlar da bar. Ótken bir jılda jáne 52 isbilermen, miynetkesh diyqan hám fermerler, intaker investorlar orden hám medallardıń iyesi boldı.
– Ásirese, qáwenderlik etip baqsha hám mektep, emlewxanalar qurıp atırǵan, járdemge mútáj shańaraqlarǵa járdem berip atırǵan, jaslardı qollap-quwatlap atırǵan qayırqom isbilermenlerimizdiń kóbeyip atırǵanı bizdi quwandıradı. Ul-qızlarımızdı sportqa tartıw ushın úlken sharayat jaratıp berip atırǵan, olardıń jáhán hám kontinent chempionatları, Olimpiada hám Paralimpiada oyınları, basqa da abıraylı xalıqaralıq jarıslarda joqarı sheklerdi iyelewine járdem berip atırǵan biznes wákilleri elimizdiń haqıyqıy pidayıları bolıp esaplanadı,-dedi Prezident.
Pursattan paydalanıp, mámleketimiz basshısı pútkil respublikamızdıń biznes wákillerine óziniń tereń hám shın júrekten minnetdarshılıǵın bildirip, bayram menen qutlıqladı.

ÓzA