Elimizde ámelge asırılıp atırǵan keń kólemli reformalardıń tiykarǵı maqseti –xalıqtıń abadan turmısın támiyinlew, mámleketimizdi dúnyanıń rawajlanǵan mámleketleri qatarına alıp shıǵıw bolıp esaplanadı.

Bul iygilikli maqsetke erisiwde hár bir aymaqtıń, hár bir insannıń óz ornı hám áhmiyeti bar. Usı mániste, Qaraqalpaqstan Respublikasınıń sociallıq-ekonomikalıq rawajlanıwına ayrıqsha itibar qaratılıwı – bul Jańa Ózbekstan strategiyasınıń áhmiyetli quramlıq bólegi bolıp esaplanadı.
Ózbekstan Respublikası Prezidenti Shavkat Mirziyoev tárepinen 2025-jıl 14-avgust kúni qabıl etilgen “Qaraqalpaqstan Respublikasın sociallıq-ekonomikalıq rawajlandırıwǵa qaratılǵan ilajlardı bunnan bılay da jedellestiriw haqqında”ǵı qararı – bul Qaraqalpaqstannıń rawajlanıwına qaratılǵan jańa imkaniyatlar esigin ashtı. Bunnan aldın da aymaqtı rawajlandırıw boyınsha kóplegen párman hám qararlar qabıl etildi hám úlken ózgerisler ámelge asırıldı. Solardıń qatarında bul qarar, tek ǵana qaraqalpaqstanlılardıń búgingi turmısın jaqsılawǵa emes, al, keleshek áwladlar ushın da múnásip sharayat jaratıwǵa xızmet etedi.
Qaraqalpaqstan Respublikası Joqarǵı Keńesi deputatı sıpatında usı qarardıń áhmiyetin ayrıqsha atap ótpekshimen. Sebebi, usı qarar sheńberinde ámelge asırılatuǵın joybar hám ilajlar Aralboyınıń ekonomikalıq potencialın arttırıw, jańa jumıs orınların jaratıw, infrastrukturanı jaqsılaw hám xalıqtıń sociallıq qorǵalıwın kúsheytiwge qaratılǵan. Sonday-aq, usı qarar partiyamızdıń Saylawaldı baǵdarlamasında belgilengen maqset hám wazıypalar menen úyleskenligi barlıq partiyalaslarımız ushın da quwanıshlı jańalıq boldı.
Atap aytqanda, partiyamız baǵdarlamasında turizm tarawın rawajlandırıwǵa ayrıqsha itibar qaratılǵan. Qaraqalpaqstannıń biytákirar tábiyatı, bay tariyxıy-mádeniy miyrası hám dástúrleri turizm ushın úlken imkaniyatlarǵa iye. Usı qarar sheńberinde Qaraqalpaqstan Respublikasınıń eski, taw hám dárya boyı aymaqlarında jańa turistlik baǵdarlardıń jolǵa qoyılıwı, Xojeli rayonı aymaǵındaǵı “Mizdaqxan” arxeologiyalıq-arxitekturalıq kompleksi, Qaraózek hám Ámiwdárya rayonları aymaǵındaǵı “Shayx Jalil baba” zıyarat etiw ornı, Qaraózek hám Ámiwdárya rayonları aymaǵındaǵı “Ámiw-qarataw” dem alıw kompleksiniń zárúr infrastruktura menen támiyinleniwi – bul “Milliy tiklanish” partiyasınıń baǵdarlamalıq maqsetlerine tolıq sáykes keledi. Bul joybarlardıń ámelge asırılıwı nátiyjesinde Qaraqalpaqstanǵa turistlerdiń aǵımı kóbeyip, aymaqtıń ekonomikalıq rawajlanıwına unamlı tásir kórsetedi.
Sonday-aq, qarar sheńberinde Qaraqalpaqstandı Qazaqstan Respulikasınıń Qızılorda wálayatı menen baylanıstırıwshı Qızılorda-Taqtakópir avtomobil jolın qurıw, Qaraqalpaqstandı Túrkmenstannıń Tashawız wálayatı menen baylanıstırıwshı Xojeli-Tashawız shegara postın ashıw máseleleriniń kórip shıǵılıwı da partiyamızdıń regionallıq birge islesiwdi rawajlandırıwǵa qaratılǵan maqsetlerine tolıq sáykes keledi.
Qarar sheńberinde, sonday-aq, 2025-2026-jıllarda jalpı aymaqlıq ónimniń kólemin ortasha 6-6,5 procentke jetkeriw, sanaat óndirisiniń kólemin 5-6 procentke arttırıw, bazar xızmetleriniń kólemin 15-17 procentke jetkeriw, “Jasıl” princip tiykarında 11 sociallıq taraw obektin qurıw hám ońlaw, 151 km avtomobil jolın ońlaw, hár jılı talaptan kelip shıǵıp, 50 ge shekem jaslardıń sırt elde bilim alıwın támiyinlew, mámleketlik joqarı bilimlendiriw mákemelerinde mámleketlik grant tiykarında oqıtıw ushın qosımsha 500 maqsetli kvota ajıratıw sıyaqlı áhmiyetli baǵdarlar ámelge asırıladı. Bul maqsetlerdiń ámelge asırılıwı Qaraqalpaqstannıń ekonomikalıq potencialın arttırıw, xalıqtıń turmıs dárejesin jaqsılaw hám jaslardıń bilim alıw imkaniyatların keńeytiwge xızmet etedi.
Biz, “Milliy tiklanish” partiyası Qaraqalpaqstan Respublikası keńesi hám barlıq deputatlar usı qarardıń nátiyjeli orınlanıwın támiyinlew ushın bar kúsh-ǵayratımızdı jumsaymız. Xalıq penen pikirlesiwdi kúsheytken hám olardıń pikir-usınısların esapqa alǵan halda, joybarlardı ámelge asırıw procesinde ashıq-aydınlıqtı támiyinleymiz hám jámiyetlik qadaǵalawdı ornatamız.
Prezidentimizdiń bul qararı Qaraqalpaqstannıń sociallıq-ekonomikalıq rawajlanıwına kúshli túrtki beretuǵınına isenemen. Bárshemiz bul qarardıń nátiyjeli orınlanıwın támiyinlewge bar kúshimizdi jumsaymız.

Tájibay Romanov,
“Milliy tiklanish” partiyası
Qaraqalpaqstan Respublikası keńesi baslıǵı
Joqarǵı Keńes deputatı
ÓzA