Prezidenttiń isbilermenler menen ashıqtan-ashıq sóylesiw túrindegi birinshi ushırasıwı 2021-jıl 20-avgustta ótkerilgen edi. Sol ushırasıwda mámleketimiz basshısı bunday ilajdı hár jılı ótkeriw hám 20-avgusttı Isbilermenler kúni dep járiyalawdı usınıs etken edi.

Sonnan berli ushırasıwlar dástúriy tárizde ótkerilip kiyatırǵanı, olarda isbilermenlerdi oylandırıp atırǵan máseleler dodalanıp, olar menen másláhátlesip qararlar qabıl etilip atırǵanı Prezidentimizdiń isbilermenlik tarawına qaratıp atırǵan ayrıqsha itibarınıń ayqın kórinisi bolıp kelmekte.
Usı kúnge shekem ashıq sóylesiwlerde isbilermenler tárepinen bildirilgen 1 mıńǵa shamalas usınıs hám baslamalar nızam hám qararlarda óz kórinisin taptı. Búgingi ashıqtan-ashıq sóylesiwge tayarlıq dawamında 26 tarawdıń 7 mıńǵa shamalas wákilleri menen ushırasıwlar ótkerildi. “Koll-oray” arqalı 13 mıńnan aslam múrájat hám baslamalar kelip tústi.
Búgingi ushırasıwda mámleketimiz basshısı usı múrájatlardı úyreniw tiykarında islep shıǵılǵan hám isbilermenlik jumısına jáne de qolaylıq jaratıwǵa qaratılǵan jańa sheshimlerdi alǵa qoyıwı kútilmekte.
Mámleketimiz basshısı Jańa Tashkentte alıp barılıp atırǵan dóretiwshilik jumısları menen de tanısadı.