Ózbekstan Respublikası Prezidentiniń 2024-jıl 15-noyabrdegi «Oqıwshı-jaslardı shaqırıwǵa shekemgi dáslepki tayarlıq sistemasın jańa basqıshqa alıp shıǵıw ilajları haqqında»ǵı qararınıń orınlanıwı sheńberinde, 2025-jıl 18-avgusttan baslap Qaraqalpaqstan Respublikası Pedagogikalıq sheberlik orayında “Mártlik mektepleri” pán baǵdarları boyınsha muǵallimlerdiń kásiplik potencialın arttırıwǵa qaratılǵan qánigeligin arttırıw kursları baslandı.

Maqset – mámleketimiz jasların áskeriy-watansúyiwshilik, milliy hám ulıwma insanıylıq qádiriyatlarǵa húrmet, joqarı ruwxıy-ádep-ikramlılıq pazıyletler ruwxında tárbiyalaw, olardıń sanasına tınıshlıq hám tatıwlıqtı kózdiń qarashıǵınday qásterlep saqlaw zárúrligin tereń sińdiriw, barlıq baǵdarlarda bilim hám kónlikpelerin arttırıw, sonday-aq, “Ózbekstan – 2030” strategiyasında elimizdi hár tárepleme rawajlandırıw boyınsha belgilengen keń kólemli wazıypalardı nátiyjeli ámelge asırıwdan ibarat.
2025-2026-oqıw jılınan baslap ulıwma orta (Prezident, dóretiwshilik, qánigelesken bilimlendiriw mákemeleri) bilimlendiriw shólkemlerinde shaqırıwǵa shekemgi baslanǵısh tayarlıq pániniń abırayın arttırıw hám ShShBT basshılarınıń jumısın muwapıqlastırıw boyınsha jańa sistema engiziledi. Onda, respublikada “Watan táǵdirine baylanıslılıq sezimi, belsendi turmıslıq poziciya” principi tiykarında jańalanǵan ShShBT pániniń oqıw baǵdarlaması hám sabaqlıqların jaratıw, bilimlendiriw shólkemlerinde ShShBT páni háptesine eki saattan oqıtılıwın belgilew, onda tayanısh oqıw rejesinde 10-11-klasslarǵa háptesine bir saattan qosımsha júkleme kirgiziw sıyaqlı wazıypalar belgilengen.
Bul kurslar sheńberinde qatnasıwshılarǵa zamanagóy pedagogikalıq qatnaslar, aldınǵı tájiriybeler, pánlerdi oqıtıwda innovaciyalıq metodlar, sonday-aq, oqıwshılarda watansúyiwshilik, mártlik hám jámiyetlik belsendilikti qáliplestiriw boyınsha ámeliy kónlikpeler beriliwi rejelestirilgen.
Kurslar 2025-jıl 22-avgustqa shekem dawam etedi.

Á.Jiyemuratov,
Qaraqalpaqstan xabar agentligi