Tashkent qalasında Qıtay Xalıq Respublikası Baslıǵı Si Czinpinniń ózbek tilinde birinshi márte basıp shıǵarılǵan “Insan huqıqların húrmet etiw hám kepilliklew haqqında” atamasındaǵı kitabınıń prezentaciyası bolıp ótti.

Ilaj Qıtay Insan huqıqların úyreniw boyınsha jámiyeti, Qıtay Xalıq Respublikasınıń Ádebiyatlardı shet tillerde basıp shıǵarıw hám tarqatıw isleri boyınsha basqarması, QXRdıń Ózbekstandaǵı elshixanası hám Insan huqıqları boyınsha Ózbekstan Respublikası Milliy orayı menen birgelikte shólkemlestirildi.
Ilajda 14-shaqırıq Ulıwmaqıtay komiteti Xalıq siyasiy másláhát keńesiniń turaqlı aǵzası, Milliy hám diniy isler boyınsha komissiya baslıǵınıń orınbasarı, Qıtay insan huqıqların úyreniw jámiyetiniń atqarıwshı vice-prezidenti Czyan Czyango, Insan huqıqları boyınsha Ózbekstan Respublikası Milliy orayınıń direktorı Akmal Saidov, QXRdıń Ózbekstandaǵı Ayrıqsha hám tolıq huqıqlı elshisi Yuy Czyun, diplomatiyalıq korpus, ilimiy hám akademiyalıq dógerekler, mámleketlik uyımlar, jámiyetlik shólkemler, ǵalaba xabar qurallarınıń wákilleri, sonday-aq, Qıtay hám Ózbekstannıń insan huqıqları tarawındaǵı ekspertleri qatnastı.
Kitap Qıtaydıń insan huqıqların qorǵaw máselelerine baylanıslı konceptuallıq kózqarasların ashıp beretuǵın dárek sıpatında ayrıqsha áhmiyetke iye ekeni atap ótildi. Bul kitaptıń ózbek tilinde basıp shıǵarılıwı ilimiy máripat almasıw, mámleketleraralıq qarım-qatnastı tereńlestiriw hám gumanitarlıq birge islesiwdi keńeytiw ushın jańa imkaniyatlar esigin ashatuǵını atap ótildi.
***
Si Czinpinniń “Insan huqıqların húrmet etiw hám kepilliklew haqqında”ǵı kitabına baǵıshlanǵan ilimiy-ámeliy seminar da shólkemlestirildi.
Qıtay tárepiniń wákilleri Ózbekstan Respublikası Prezidentiniń basshılıǵında mámlekette insan huqıqları tarawında ámelge asırılıp atırǵan keń kólemli reformalardıń nátiyjelerin joqarı bahaladı.
Ózbekstannıń xalıqaralıq maydanlarda alǵa qoyǵan baslamaları qollap-quwatlandı. Bul háreketler regionnıń turaqlı rawajlanıwı hám dúnya jámiyetshiligine integraciyalasıwı, mámleketler arasında óz-ara túsinisiw hám birge islesiwdi bekkemlew baǵdarında úlken áhmiyetke iye ekeni atap ótildi.
Qatnasıwshılar huqıqıy sóylesiw hám institucionallıq birge islesiwdi rawajlandırıw insan huqıqların qorǵaw milliy sistemalarınıń nátiyjeliligin arttırıwǵa xızmet etetuǵının ayrıqsha atap ótti.
Shıǵıp sóylegenler insan huqıqları tarawında maman qánigelerdi tayarlawǵa qaratılǵan ilimiy-aǵartıwshılıq baslamalardıń áhmiyetin joqarı bahaladı. Sonday-aq, Ózbekstan hám Qıtay universitetleri hám ilimiy orayları arasında birgeliktegi izertlew joybarları hám akademiyalıq almasıwlardı rawajlandırıw áhmiyetli ekenligine itibar qaratıldı.
Seminar juwmaǵında tárepler insan huqıqları tarawındaǵı zamanagóy qáwip-qáterlerdi tereń úyreniw hám ámeliy usınıslar islep shıǵıwǵa qaratılǵan birgeliktegi forumlar, seminarlar hám ekspert ushırasıwların shólkemlestiriw arqalı eki tárepleme birge islesiwdi keńeytiwge tayar ekenin bildirdi.
***
Ilaj sheńberinde A.Saidov hám C.Czyango ushırasıwı bolıp ótti.
Qıtay delegaciyası aǵzalarına Ózbekstannıń milliy nızamshılıǵı hám insan huqıqların támiyinlew tarawındaǵı tiykarǵı ózgerisler haqqında tolıq maǵlıwmat berildi. Atap aytqanda, Insan huqıqları boyınsha 2030-jılǵa shekem mólsherlengen milliy strategiya joybarı islep shıǵılǵan.
Óz gezeginde, Qıtayda ámelge asırılǵan izbe-iz reformalar hám ashıq-aydınlıq siyasatı nátiyjesinde joqarı qádiriyat esaplanǵan insan huqıqların qorǵaw baǵdarında áhmiyetli nátiyjelerge erisilgeni atap ótildi.
C.Czyango Ózbekstannıń insan huqıqları tarawında erisken rawajlanıwın joqarı bahalap, bul baǵdardaǵı jedel hám keń kólemli reformalardı – sheksiz jańalanıwlar, dep bahaladı. Ózbekstan Respublikasınıń xalıqaralıq baslamaları tiykarında BMSh Bas Assambleyasınıń 15 rezolyuciyası qabıl etilgenin atap ótti.
Bul baǵdardaǵı nátiyjeli qádemler, óz gezeginde, mámlekettiń xalıqaralıq maydandaǵı abırayı barǵan sayın artıp atırǵanın ayqın kórsetpekte. Ásirese, Qıtay Xalıq Respublikası hám Ózbekstan Respublikası birgelikte islep shıǵılǵan “Civilizaciyalararalıq qarım-qatnas xalıqaralıq kúni” atamasındaǵı rezolyuciyanıń BMSh Bas Assambleyası tárepinen qabıl etilgenine ayrıqsha itibar qaratıldı.
Birge islesiwdi jáne de tereńlestiriw maqsetinde bir qatar anıq rejeler, atap aytqanda, insan huqıqları tarawındaǵı milliy strategiyalar hám háreketler rejelerin ámelge asırıwǵa kózqaraslardı úyreniw, insan huqıqları boyınsha xalıqaralıq hám milliy kún tártibiniń áhmiyetli máseleleri, sonıń ishinde, sanlı mákanda huqıqlardı qorǵaw hám qolaylı qorshaǵan ortalıqqa bolǵan huqıqtı támiyinlew sıyaqlı zamanagóy qáwip-qáterler boyınsha turaqlı birgeliktegi seminarlar hám konferenciyalar ótkeriw boyınsha kelisip alındı.

N.Abduraimova,
A.Mamadaminov (súwret), ÓzA