Xalqımızda ásirler dawamında óz mazmun-mánisin joǵaltpay kiyatırǵan ibratlı qádiriyatlar bar. Awızbirshilik, óz-ara miyrim-shápáát, saqawat, basqalardıń awırın jeńil etiw sıyaqlı iygilikli túsiniklerdi ózinde jámlegen mine usınday qádiriyatlardan biri – shembilik bolıp esaplanadı.

Mámleketimizde eń ullı, eń áziz áyyyam – Ǵárezsizlik bayramı aldında ulıwmaxalıqlıq qayırqomlıq shembiligin shólkemlestiriw jaqsı dástúrge aylanǵan.
22-23-avgust (juma-shembi) kúnleri “Abat hám payızlı máhálle – jurt kórki” súreni astında ulıwmaxalıqlıq qayırqomlıq shembiligin ótkeriw názerde tutılmaqta.
Bul processte ulıwma xalıqlıq qayırqomlıq shembiligin ótkeriw boyınsha jumısshı topardıń quramı tastıyıqlandı.
Hár bir máhállede shembilik dawamında ámelge asırılatuǵın jumıslar kóshe hám shańaraq kesiminde belgilep alındı. Sonıń ishinde, máhállelerdi abadanlastırıw baǵdarında 24,9 mıń gektardan aslam maydanlar abadanlastırıladı. 19,7 mıń tonnadan aslam shıǵındı shıǵarıp taslanadı, 21,3 mıń kilometr uzınlıqtaǵı salma hám lotoklar tazalanadı.
Jaslardı tartqan halda 10 mıń 724 qoyımshılıq (sonnan, 515 i ońlawǵa mútáj) abadanlastırıladı hám ońlanadı. 638 zıyarat etiw ornı hám 143 mıńnan aslam kóshe tártipke keltiriledi. 20 millionnan aslam terekler háklenip, olarǵa forma beriledi.
Shembilik dawamında kem kewil, járdemge mútáj watanlaslarımızǵa da ayrıqsha itibar kórsetiledi. Sonıń ishinde, xalıqtı sociallıq qollap-quwatlaw baǵdarında 44 mıń 322 kem támiyinlengen shańaraqlardıń turaq jayları kómek jolı menen ońlanadı. 98 mıń 581 kem támiyinlengen shańaraqlardıń qıytaq jerlerine eginler egiledi. 61 mıń 816 járdemge mútáj shańaraqlar, sonıń ishinde, 23 mıń 650 mayıp hám jalǵız kekseniń halınan xabar alınıp, olarǵa materiallıq járdemler kórsetiledi.
Sonday-aq, xalıq wákilleriniń qatnasıwında 450 ge shamalas turmıslıq xızmet kórsetiw shaqapshaları, óndiris kárxanaları, máhálle imaratları, balalar sport maydanshaları hám basqa da sociallıq obektler paydalanıwǵa tapsırıladı.
Sonıń menen birge, hár bir máhállede elimizde ámelge asırılıp atırǵan abadanlastırıw jumısları, salamat turmıs tárizi hám sanitariyalıq-gigienalıq mádeniyattı úgit-násiyatlawǵa baylanıslı dógerek sáwbetleri hám seminarlar shólkemlestiriledi.
Watanımız ǵárezsizliginiń 34 jıllıǵı aldınan shólkemlestirilip atırǵan ulıwmaxalıqlıq qayırqomlıq shembiligi xalqımızdıń awızbirshiligi hám tileklesliginiń jáne bir ózine tán úlgisi bolatuǵını sózsiz.

Nazokat Usmonova, ÓzAnıń xabarshısı