Nızamshılıq palatasınıń májilisinde Oraylıq bank baslıǵı T.Ishmetovtıń “Bank sistemasın reformalaw hám kommerciyalıq banklerdi transformaciyalaw baǵdarında ámelge asırılıp atırǵan jumıslar”ǵa baylanıslı parlamentlik sorawǵa juwabı hár tárepleme dodalandı.

Sorawda mámleketlik úleske iye banklerdi transformaciyalaw, xalıqaralıq standartlar hám málimleme texnologiyaların engiziw, sırt el investorların tartıw, bank xızmetleriniń qamtıp alınıwın keńeytiw, finanslıq turaqlılıqtı támiyinlew hám korrupciyalıq faktorlardı saplastırıw máselelerine ayrıqsha itibar qaratıldı.
Oraylıq banktiń juwabında atap ótilgenindey, 2020-2025-jıllarda 3 bank menshiklestirilip, 9 jańa jeke menshik bank, sonıń ishinde, 3 sırt el qarjı mákemesiniń jumısı jolǵa qoyılǵan. Sonıń nátiyjesinde mámleketlik úleske iye bankler aktivleriniń úlesi 85 procentten 65 procentke shekem qısqarǵan.
Deputatlar parlamentlik sorawǵa alınǵan juwapta keltirilgen nátiyjelerdi unamlı bahaladı. Atap aytqanda, 2020-2025-jıllar dawamında mámleketlik úleske iye banklerdiń kapital bazasın bekkemlew maqsetinde jámi 34,1 trillion sum qarjı qaratılǵan. Bul ilajlar kreditlew imkaniyatların keńeytiw, bank xızmetleriniń sapasın arttırıw hám sistemanıń finanslıq turaqlılıǵın támiyinlewge xızmet etken.
2021-jıl aprel ayınan baslap Shańaraqlıq isbilermenlikti rawajlandırıw baǵdarlamaları sheńberinde jeńilletilgen kreditler alıw, ashıq-aydınlıqtı, qarjılardıń nátiyjeliligin támiyinlew maqsetinde www.oilakredit.uz (https://www.oilakredit.uz/) birden-bir elektron platforması iske qosıldı. Bul arqalı shańaraqlıq kreditlerdi monitoring etiw hám qadaǵalaw imkaniyatı jaratıldı.
Xalıq wákilleri keleshekte xalıq hám kishi biznes ushın aralıqtan xızmetlerdi rawajlandırıw maqsetinde málimleme qáwipsizligi hám kiberqáwipsizlik ilajların keńeytiw zárúrligine itibar qarattı. Sonıń menen birge, bank hám tólem shólkemleri arasında maǵlıwmatlardı qorǵalǵan telekommunikaciya tarmaqları arqalı jetkerip beriw imkaniyatın beretuǵın arnawlı málimleme sistemasın engiziw jumısların jedellestiriw boyınsha usınıslar berdi.
Májiliste usınılǵan parlamentlik sorawǵa juwap maǵlıwmat ushın qabıl etildi.

Muhtarama Komilova, ÓzA