Parlamenttiń tómengi palatasınıń májilisinde deputatlar sport ministri A.Ikromovqa “Xalıqtıń keń qatlamları, sonıń ishinde, fizikalıq imkaniyatı sheklengen hám mayıplıǵı bolǵan shaxslar arasında denetárbiya hám sport boyınsha ǵalabalıq ilajlardı shólkemlestiriw baǵdarında ámelge asırılıp atırǵan jumıslar haqqında”ǵı parlamentlik sorawdı jiberiw haqqındaǵı máseleni kórip shıqtı.
Atap ótilgenindey, mámleketimizde fizikalıq imkaniyatı sheklengen hám mayıplıǵı bolǵan shaxslardı mámleket tárepinen hár tárepleme qollap-quwatlaw, sonıń ishinde, olardıń sport penen turaqlı shuǵıllanıwı ushın zárúr sharayatlardı jaratıw, xalıqaralıq sport jarıslarında múnásip qatnasıwın támiyinlew baǵdarında sistemalı jumıslar ámelge asırılmaqta.
Sonıń menen birge, tarawda óz sheshimin kútip atırǵan ayırım mashqalalar saqlanıp qalmaqta. Sonıń ishinde, Prezidentimizdiń 2024-jıl 8-noyabrdegi “Mayıplıǵı bolǵan shaxslardı sportqa tartıw arqalı fizikalıq reabilitaciyalaw sistemasın jetilistiriw boyınsha qosımsha ilajlar haqqında”ǵı qararında belgilengen ayırım máselelerdiń orınlanıwı tolıq támiyinlenbegen. Atap aytqanda, respublikamızdaǵı sport mektepleriniń kópshilik bólegi, ásirese, belgili bir sport túrine qánigelesken sport mektepleri beyimlestiriwshi sport túrleri boyınsha sport úskeneleri menen tolıq támiyinlenbegen.
Sonday-aq, beyimlestiriwshi denetárbiya hám sport tarawında qánigelerdi tayarlaw institutında gereńler hám kózi ázziler sportı, arnawlı olimpiada sport túrleri jáne mayıplıǵı bolǵan shaxslar shuǵıllanatuǵın basqa da sport túrleri baǵdarlarında qánigeligin arttırıw kursları jeterli dárejede shólkemlestirilmegen.
Mayıplıǵı bolǵan shaxslardıń funkcionallıǵın bahalaw nátiyjelerine muwapıq, fizikalıq reabilitaciya xızmetlerin kórsetiw sisteması jetilistiriliwi kerek. Bul kategoriyadaǵı shaxslardıń sport penen shuǵıllanıwı ushın qolaylı sharayatlar jaratıw hám infrastrukturanı beyimlestiriw máseleleri de búgingi kún tártibindegi áhmiyetli másele bolıp esaplanadı.
Májiliste joqarıdaǵılardan kelip shıǵıp, xalıqtıń keń qatlamları, sonıń ishinde, fizikalıq imkaniyatı sheklengen hám mayıplıǵı bolǵan shaxslar arasında denetárbiya hám sport boyınsha ǵalabalıq ilajlardı shólkemlestiriw baǵdarında ámelge asırılıp atırǵan jumıslar boyınsha tiykarlanǵan túsinikler beriw haqqında sport ministrine parlamentlik soraw jiberildi.

Muhtarama Komilova,
ÓzA