Ózbekstan Respublikası Prezidenti Shavkat Mirziyoev 18-avgust kúni Tashkent qalasında qurıp pitkerilgen Olimpiada qalashası, Joqarı Shırshıq rayonındaǵı Milliy Futbol orayınıń jumısı hám jańa turizm infrastrukturası obektleri menen tanıstı.

Mámleketimizde keyingi jıllarda barlıq tarawlarda keń kólemli izbe-iz reformalar ámelge asırılmaqta. Onıń nátiyjesin jalpı ishki ónim kóleminiń ósiwi, isbilermenlik subektleriniń sanı esesine artıp atırǵanı, sanaattaǵı joqarılaw, kámbaǵallıq dárejesiniń tómenlewi sıyaqlı áhmiyetli baǵdarlarda kórmektemiz.
Ǵárezsizlik xalqımızǵa, áne, usınday erkinlik hám jańa ómir alıp kelgenin búgin kóp eske almaqtamız. Mámleketimizdiń barlıq aymaqlarında Ózbekstan Respublikası mámleketlik ǵárezsizliginiń otız tórt jıllıq bayram nápesi gezip júripti. Bayram aldınan túrli sociallıq taraw obektleri hám basqa obektler qurıp pitkerilmekte. Bul xalqımızǵa tán qádiriyat – toyǵa sawǵa.
Paytaxtımızdaǵı Olimpiada qalashasında da, áne, usınday bayram keypiyatı húkim súrmekte. Mámleketimiz basshısı usı komplekske bardı.
Onıń qurılısına 2022-jıl 9-noyabrde tırnaq tası qoyılǵan edi. Sol waqıtta mámleketimiz basshısı Olimpiada qalashası xalqımızdıń joqarı dóretiwshilik potencialı hám ózbek sportınıń úlken jetiskenlikleriniń simvolına aylanatuǵının, arxitekturalıq jaqtan jetik, energiyanı únemleytuǵın hám eń aldınǵı innovaciyalıq sheshimlerdi jámlegen zamanagóy kompleks bolatuǵının atap ótken edi.
Atap ótkenindey – qısqa waqıt ishinde 100 gektardan aslam maydanda sawlatlı kompleks boy tikledi. Derlik 290 million dollarlıq bul biybaha joybar “CAMC Engineering” kompaniyası tárepinen xalıqaralıq talaplarǵa muwapıq ámelge asırıldı.
Qalashada 5 tiykarǵı sport kompleksi jaylasqan.
Atap aytqanda, Velodrom quramalı injenerlik sheshimler tiykarında, ózine tán dizaynda qurılǵan. Onıń aǵash qaplamasınıń sapası, traektoriyası hám burılıw múyeshleri Xalıqaralıq Olimpiada komitetiniń talaplarına juwap beredi. Sonıń ishinde, jol eń bekkem tereklerden islengen, qabatpa-qabat jatqarılǵan. Bul sapa turaqlı saqlanıwı ushın velodromda jıl dawamında bir túrdegi temperatura támiyinlenedi. Hátteki velosportshılarǵa hawa qarsılıǵına shekem esapqa alınǵan.
Trekke jaqtılıq birdey hám teńdey dárejede túsedi. Bul sportshılarǵa qolaylı bolıwı menen birge, tamasha hám televidenie translyaciyası normalarına da sáykes keledi. Orınlıqlar 2 mıń 200 adamǵa mólsherlengen. Xalıqaralıq Olimpiada komitetiniń jańa talabı boyınsha tamasha orınlarına qorǵanıw tosıǵı ornatılǵan.
Sonday-aq, kompleks kóp funkciyalı bolıp, bul jerde stol tennisi, qılıshlasıw boyınsha jarıslar hám shınıǵıwlar ótkeriw de múmkin. Bunday dárejedegi velodrom Ózbekstanda birinshisi.
Juwapkerlerge aymaqlarda sharayat jaratıp, velosporttı rawajlandırıw boyınsha baǵdarlama tayarlaw wazıypası qoyıldı.
Prezidentimiz stol tennisi hámmege qolaylı, arzan sport ekenin atap ótip, hár bir mektep hám máhállede onı ǵalaba en jaydırıw, ásbap-úskenelerin islep shıǵarıw boyınsha kórsetpeler berildi.
Qalashanıń orayında 12 mıń orınlıq stadion jaylasqan. Xalıqaralıq turnirler waqtında bul jerde saltanatlı máresimler shólkemlestiriledi. Tiykarǵısı, jasıl maydan hám 9 qatarlı juwırıw jolında jeńil atletikanıń 48 baǵdarı boyınsha jarıslar ótkeriledi. Sonıń ishinde, jáhán chempionatı, Brilliant ligası, paraatletika bellesiwleri, kózi ázziler arasında IBSA oyınların shólkemlestiriw múmkin. Basqa waqıtlarda stadionnan jergilikli oqıw-jıyınları, ámeliy shınıǵıwlar arqalı dual bilimlendiriwde paydalanıladı.
Stadiondaǵı tórt qabatlı imaratta saylandı komandalardıń qánigeleri hám sport federaciyaları jumıs alıp baradı.
Jeńil atletika hám para sport túrleri xalıqtıń salamatlıǵın bekkemlewde júdá nátiyjeli. Olimpiada hám Aziya oyınlarında olar boyınsha baǵdarlama da keń. Biraq elimizde bul imkaniyatlar tolıq iske qosılmay atırǵanı kórsetip ótildi.
Sonlıqtan jeńil atletikanıń barlıq baǵdarların rawajlandırıw boyınsha tapsırma berildi. Oǵan bola, wálayatlardaǵı stadionlar rekonstrukciyalanıp, jeńil atletika ushın sharayatlar jaqsılanadı, sırt elden trenerler alıp kelinedi, sportshılardıń sheberligin arttırıw maqset etip qoyıladı.
Úlken suw sportı sarayı da zamanagóy hám qolaylı. Onda 25×50 metrlik júziw hám 25×20 metrlik suwǵa sekiriw basseynleri, shınıǵıwlar ushın basseyn hám trenajyor zalları bar. Barlıq sharayatlar hám ólshemler xalıqaralıq olimpiada standartınıń talaplarına juwap beredi.
Jaqında “World Aquatics” federaciyası delegaciyası kompleksti kózden ótkerdi hám bunı tastıyıqladı. Yaǵnıy, bul jerde júziw, suwǵa sekiriw, sinxron júziw, suw polosı boyınsha kontinent hám jáhán chempionatları, Olimpiada baǵdarlamasındaǵı abıraylı jarıslardı shólkemlestiriw imkaniyatı bar. Olardı 2 mıńnan aslam ıqlasbentler tamasha etiwi múmkin.
Mámleketimiz basshısı suw sport túrlerin rawajlandırıw, xalıqaralıq turnirlerde nátiyjelerdi jaqsılaw boyınsha óz pikirlerin bildirdi.
Komandalıq hám jeke gúres sport túrleri kompleksleri de xalıqaralıq talaplar dárejesinde qurılǵan. Olardıń hár biri úsh qabatlı, 2 mıń orınlıq. Sonıń ishinde, birinshisinde voleybol, basketbol hám gandbol boyınsha shınıǵıwlar hám xalıqaralıq jarıslardı ótkeriw múmkin. Jeke gúresler kompleksi dzyudo, boks, taekvondo sıyaqlı sport túrlerin rawajlandırıwǵa tiykar boladı.
Prezidentimiz usı jerde sportshılar menen sáwbetlesti.
– Xalıqaralıq jarıslarda bayraǵımızdı bálent kóterip, mámleketimizdiń rawajlanıwın kórsetip atırsız. Siziń hár bir jetiskenligińiz xalqımız ushın úlken maqtanısh, jaslarımızǵa ǵayrat, kúsh-jiger. Bul háreketlerdi dawam ettirip, balalardı izinizden ertip, sportımızdı jáne de rawajlandırıwıńızdı tileymiz, – dedi Shavkat Mirziyoev.
Olimpiada qalashasında futbol, voleybol, tennis, shóp ústinde xokkey, jeńil atletika sıyaqlı 15 ashıq maydan da qurıldı.
Bunnan tısqarı, 400 orınlıq paralimpiya jataqxanası, sport medicinası ilimiy-ámeliy orayınıń qurılısı juwmaqlanıw basqıshında.
Qalashadaǵı barlıq imaratlar energiyanı únemleydi. Avtomobil turatuǵın orınlardıń ústinde quyash panelleri ornatıladı.
Olimpiada qalashası – mámleketimiz sportınıń ilimiy, ámeliy, oqıw-shınıǵıw orayı.
Bul haqqında Prezident Shavkat Mirziyoev 2023-jıl 18-noyabrde Olimpiada qalashasınıń qurılısı menen tanısıw waqtında aytqan edi.
– bul jerde shınıǵıwlar menen birge sport bilimlendiriwi, ilimi, medicinası bolıwı zárúr. Yaǵnıy, bul jer mámleketimiz sportınıń ilimiy, ámeliy, oqıw-shınıǵıw orayı boladı, – degen edi mámleketimiz basshısı.
Usıǵan muwapıq, qalashada Sport ministrligi, Antidoping agentligi, mámleketlik sport akademiyası, Dene tárbiya hám sport ilimiy izertlewler institutı, Sport túrlerin rawajlandırıw orayı da jaylastırılǵan.
Bul gezektegi sapar waqtında Olimpiada qalashasınıń infrastrukturasınan nátiyjeli paydalanıw rejeleri, sport shólkemleriniń jaylasıwı hám jumısı boyınsha málimleme berildi.
Bárinen burın, qalashada xalıqaralıq dárejedegi jarıslar ótkeriledi. Kompleksler onnan keyin de bosap qalmaydı. Mámleketimiz saylandı komandalarınıń oqıw-shınıǵıwları shólkemlestiriledi. Federaciyalar sport mektepleri menen baylanısadı.
Aymaqta hám komplekslerde watanlaslarımız da sport penen shuǵıllanıwı múmkin boladı.
Prezidentimiz usı jerde taraw juwapkerleri hám sport federaciyalarınıń basshıları menen sóylesti.
– Bárinen burın, sportshılarımız hám federaciyalardı mine, usınday oray menen qutlıqlayman. Onıń menen jas áwlad salamatlıǵına, bolajaq jetiskenliklerge úlken tırnaq saldıq. Biraq bul jumıstıń eń ańsatı. Qıyını – sport túrlerin ǵalaba en jaydırıw, professional sportshılardı tayarlaw. Biz sporttı hám salamatlıq, hám nátiyjelilik kózqarasınan rawajlandırıp baramız. Quday qálese, usınday Olimpiada qalashaları wálayatlarda da qurıladı. Tiykarǵı maqset – jaslarımızdıń salamat hám bárkamallıǵı, – dedi mámleketimiz basshısı.
Bizge belgili, 2024-jılı Parijde ótken Olimpiada hám Paralmpiada oyınlarında elimiz sportshıları tabıslı qatnasıp, ulıwma komandalıq esapta hár eki baǵdara 13-orındı iyelegen edi. Endi olimpiada háreketin jáne de rawajlandırıw, keleshektegi jarıslarda nátiyjelerdi arttırıw maqset etilgen.
Mámleketimiz Prezidentiniń usı jıl 8-iyuldegi qararı menen Ózbekstan sportshıların 2028-jılǵı Olimpiada hám Paralimpiada oyınlarına tayarlaw baǵdarlaması qabıl etildi.
Bul baǵdardaǵı jumıslardı sistemalı shólkemlestiriw maqsetinde Milliy olimpiada komitetiniń 14 aymaqlıq bólimi shólkemlestirildi. Qaraqalpaqstan Respublikası Joqarǵı Keńesi Baslıǵı, wálayatlar hám Tashkent qalası hákimleri Olimpiada háreketin rawajlandırıw boyınsha Ózbekstan Respublikası Prezidentiniń arnawlı wákili etip belgilendi. Hár bir aymaqqa Sport ministrligi hám Olimpiada komitetinen juwapkerler biriktirildi.
Talantlı sportshılardı eń tómengi buwınnan baslap saylaw hám professional etip tayarlaw ushın úsh basqıshlı «Jańa Ózbekstan Olimpiada shoqqıları» jarısı jolǵa qoyıldı. Onıń final basqıshı hár jılı Olimpiada qalashasında «Prezident Olimpiadası» sıpatında ótkeriledi. Jeńimpaz hám sıylı orındı iyelegen sportshılar Olimpiada oraylarına tartılıp, professional tayarlanadı.
Respublikalıq olimpiada hám paralimpiada orayınıń jumısı milliy saylandı komandalar rezervin jaratıwǵa qaratıladı. Oqıw-shınıǵıwlar ótkerip barıw ushın Olimpiada qalashasınıń kompleksleri orayǵa biyǵarez tiykarda biriktiriledi.
Sonday-aq, atletlerdiń rezervin keńeytiw maqsetinde jeke menshik sport klublarınıń jumısı jetilistirip, rásmiy jarıslardaǵı qatnasıwı támiyinlenedi. Joqarı nátiyje kórsetken sportshılar milliy saylandı komandalarǵa qabıl etiliwi múmkin boladı.
Prezidentimiz sport túrlerin ǵalaba en jaydırıw máselesine ayrıqsha áhmiyet qaratpaqta.
– Mártlik, gúresiwsheńlik xalqımızdıń qanında bar. Adamlarımız sporttı jaqsı kóredi. Onı qollap-quwatlap, máhállelerde sporttı jáne de ǵalaba en jaydırıw kerek. Onıń ushın orınlarda sharayat bar. Jáne qurmaqtamız. Nátiyje de ǵalabalıqtan kelip shıǵadı, – dedi Shavkat Mirziyoev.
Juwapkerlerge tarawdı sanlastırıw, sport federaciyalarınıń jumısın kúsheytiw, nátiyjeli sport túrlerin kóbeytiw boyınsha kórsetpeler berildi.
Soń Prezident Shavkat Mirziyoev Tashkent wálayatı Joqarı Shırshıq rayonında qurılǵan Milliy futbol orayın barıp kórdi.
Mámleketimiz basshısı eki jıl aldın bul jerge kelip, bar stadionǵa tutas aymaqta zamanagóy kompleks qurıw zárúr ekenligin aytqan edi. Kóp ótpey, 2023-jıl 3-noyabrde «Futbol-bilimlendiriw mákemeleri tarmaǵın keńeytiw hám xalıqaralıq standartlarǵa sáykes keletuǵın futbol infrastrukturasın rawajlandırıw ilajaları haqqında»ǵı Prezident qararına qol qoyıldı.
Ǵárezsizlik bayramı aldında paydalanıwǵa tapsırılǵan bul oray bunda oǵada áhmiyetli buwın bolıp esaplanadı. Bul jerde bir waqıttıń ózinde 6 saylandı komandamızdıń oqıw-shınıǵıw jıyınların ótkeriw imkaniyatı bar. Onıń ushın standionlar, oqıw imaratları, sport zalları, miymanxana qurılǵan. Plyaj futbolı maydanı, futzal maneji, basseyn hám reabilitaciya bólimi qosımsha qolaylıqlar jaratqan.
Komplekste professional futbolshı hám qánigelerdi tayarlaw ushın tórt struktura dúzildi. Olar – Futbol qánigelerin tayarlaw hám ilimiy-izertlew orayı, Futbol saylandı komandaların tayarlaw orayı, Respublikalıq futbol akademiyası, Sport medicinası hám reabilitaciya orayı bolıp esaplanadı.
Prezidentimiz olarda jaratılǵan sharayatlar menen tanıstı.
Futbol medicinası hám reabilitaciyası bólimine sırt el úskeneleri alıp kelingen, eń aldınǵı usıllar ózlestirilgen. Bul futbolshılarǵa qısqa waqıt ishinde fizikalıq jaqtan tikleniw imkaniyatın beredi.
Futbol akademiyasında jas qábiletliler saylanıp, tárbiyalanadı. Onı xalıqaralıq dárejede shólkemlestiriw ushın orayǵa Argentina, Vengriya hám Xorvatiya sıyaqlı mámleketlerden qánigeler tartılǵan. Olar maman trener, tóreshi, tallawshı, selekcioner hám futbol menedjerlerin tayarlawda qatnaspaqta. Komplekste «VAR orayı» da shólkemlestirilgen.
Mámleketimiz basshısı usı jerde sport veteranları hám jas futbolshılar menen sóylesti. Ózbekstanda futbol eń ǵalabalıq sport ekeni, onı rawajlandırıw izbe-iz dawam etiletuǵını atap ótildi.
Keyingi jıllarda futbol sisteması túp-tiykarınan jaqsılandı. Balalar futbolı, dógereklerden baslap akademiyalar, komandalar, chempionatqa shekem itibar kúsheydi. Nátiyjeler izbe-iz kózge taslanbaqta. Olardıń eń áhmiyetlisi – Watanımız tariyxında birinshi márte milliy saylandı komandamız jáhán chempionatına shıqqanı boldı.
Jáne bir dańqlı jetiskenlik aprelde Saudiya Arabstanında bolıp ótken Aziya kubogide qolǵa kirgizildi. 17 jasqa shekemgi jas óspirimler saylandı komandamız onda birinshi orındı iyelep, jáhán chempionatına jollama alǵan edi.
Prezidentimiz bul qaharman futbolshılarımız benen ushırasıp, olarǵa mehir-itibarın kórsetti.
– Biz hámme tarawda dúnyada múnásip orın iyelewge umtılmaqtamız. Sportshılarımız onı tezirek jetkere aladı. Sizler kúshli jeńisińiz benen xalqımız miynet etse, háreket etse, hámme nársege uqıplı ekenin jáne bir márte dálilledińiz. Pútkil dúnya siziń tımsalıńızda kúsh-ǵayratlı, maqtanıshı bálent, hesh qashan umtılıwdan qaytpaytuǵın jańa Ózbekstan áwladın kórdi. Endi futboldı házirgiden de eki-úsh esege kóbirek qollap-quwatlaymız. Sizdey jaslar xalqımızdıń isenimi, Prezidenttiń quwanıshısız, – dedi Shavkat Mirziyoev.
Sportshılar bul sharayatlar ushın mámleket basshısına minnetdarshılıq bildirip, xalqımızdıń isenimin aqlawǵa wáde berdi.
Mámleketimizdiń turizm potencialı jıldan-jılǵa artıp barmaqta. Barlıq aymaqlarda turistler kóbeyip, zamanagóy miymanxanalar hám turizm orayları qurılmaqta.
Tashkent qalasındaǵı «Jańa Ózbekstan» baǵına tutas qurılǵan zamanagóy miymanxanalar kompleksi usı jumıslardıń logikalıq dawamı bolıp esaplanadı.
Prezident Shavkat Mirziyoev orınlardaǵı qurılıs penen tanısıw waqtında usı obektlerdi de kózden ótkerdi.
Bir waqıtları qarawsız turǵan mánziller búgin abat orayǵa aylanǵan. 8 gektardan aslam maydanda 12 zamanagóy miymanxana, 375 orınlıq «Jańa Tashkent» konferenciya zalı, 310 orınlıq restoran, salamatlandırıw orayı hám ashıq sport maydanı qurılǵan.
Miymanxanalarǵa Qaraqalpaqstan hám wálayatlardıń atları berilgen. Olar 3 juldızlı bolıp, 5 qabattan ibarat, 62 xana hám 124 orınǵa iye. Kompleks birden- bir koncepciya tiykarında jumıs isleydi hám onıń basqarıwı xalıqaralıq tájiriybege iye “Leo Hospitality Solutions”, “Radisson Individuals”, “Trademark Collection by Wyndham” sıyaqlı abıraylı kompaniyalarǵa tapsırıladı.
Jeke menshik bankler usınday komplekslerdi basqarıwǵa sherik bolıp kiriw usınısın bildirdi. Mámleketimiz basshısı xızmet tarawlarınıń keńeyiwi, orınlarda zamanagóy orınlardıń kóbeyiwi xalıqtıń abadanlıǵına úles qosatuǵının atap ótti.
Miymanxanalar restoran, ánjumanlar zalı hám dem alıw orınları menen úylesikli qurılǵanı xızmet kórsetiw kólemin arttıradı. Bul jerde joqarı dárejedegi ilajlar hám iri xalıqaralıq ánjumanlar ótkeriliwi de múmkin.
Komplekste 540 jańa jumıs ornı jaratılıp, jılına ortasha 55 mıń turistke xızmet kórsetiliwi názerde tutılǵan. Bul jer jergilikli hám sırt elli turistler ushın jáne bir lokaciya, Tashkent qalasında turizmniń rawajlanıwı ushın qosımsha túrtki boladı. Komplekstiń qurılısınan keyin átiraptaǵı máhállelerdiń infrastrukturası da jaqsılanıp, xalıqtıń abadanlıǵı támiyinlendi.
Mámleketimiz basshısı komplekste xızmet túrlerin kóbeytiw hám sapasın arttırıw, jergilikli hám sırt elli turistlerdi tartıw máselelerine itibar qarattı. Bunday kóp tarmaqlı xızmetlerdi basqa aymaqlarda da keńnen jolǵa qoyıw áhmiyetli ekenligi atap ótildi.

Ziyodulla JONIBEKOV,
Ikrom AVVALBOEV,
Abdulaziz RUSTAMOV,
Behruz XUDOYBERDIEV,
ÓzA xabarshıları