Oliy Majlis Senatı Baslıǵı Tanzila Norboevanıń Qazaqstan Prezidenti Qasım-Jomart Toqaev penen ushırasıwı bolıp ótti.

Ushırasıw waqtında parlamentleraralıq qatnasıqlardı rawajlandırıw kózqarasınan Qazaqstan-Ózbekstan strategiyalıq sherikligi hám awqamlaslıǵınıń áhmiyetli máseleleri dodalandı.
Prezident Ózbekstan Oliy Majlisi Senatı Baslıǵın qızǵın qutlıqlap, onıń Astanaǵa saparı Qazaqstan hám Ózbekstan arasındaǵı strategiyalıq qatnasıqlardıń ózine tán belgisiniń ayqın dálili ekenin atap ótti.
Qasım-Jomart Toqaev Tanzila Norboevanıń eki xalıq arasındaǵı doslıq hám jaqsı qońsıshılıq qatnasıqların bekkemlewge qosqan jeke úlesin joqarı bahaladı:
«Siziń saparıńız mámleketlerimiz arasındaǵı doslıq qatnasıqlardı bekemlew kózqarasınan oǵada áhmiyetli. Biz tuwısqan Ózbekstan menen birge islesiwdi rawajlandırıwǵa úlken áhmiyet qaratamız. Bul Oraylıq Aziya regionında turaqlılıq hám qáwipsizlikti támiyinlewde oǵada áhmiyetli faktor, dep esaplaymız. Mámleketlerimiz arasındaǵı qatnasıqlar qánshelli jaqsı, tıǵız hám nátiyjeli bolsa, ulıwma regiondaǵı jaǵday sonshelli tınısh boladı. Siziń saparıńızǵa kelsek, onı qatnasıqlarımızdıń oǵada áhmiyetli elementi bolǵan parlamentleraralıq qatnasıqlardı bekkemlew kózqarasınan haqıyqattan da áhmiyetli, dep bilemen».
Óz gezeginde Tanzila Norboeva Qasım-Jomart Toqaevqa qızǵın qabıllaǵanı ushın minnetdarshılıq bildirip, Prezident Shavkat Mirziyoevtiń sálemin jetkerdi.
– Mámleketimiz basshısı sizge óziniń jıllı sálemin jolladı hám alıp barıp atırǵan jumıslarıńızda úlken tabıslar tiledi. Birgelikte erisilgen kelisimlerdiń orınlanıwın nátiyjeli támiyinlewge biz, parlament aǵzaları, bárqulla óz úlesimizdi qosamız. Siz aytqanıńızday, Ózbekstan ushın Qazaqstan, Qazaqstan ushın Ózbekstan eń jaqın, isenimli birge islesiwshi bolıp esaplanadı, – dedi Ózbekstan Oliy Majlisi Senatı Baslıǵı.
Sonday-aq, parlamentleraralıq diplomatiyanı, sawda-ekonomikalıq hám investiciyalıq birge islesiwdi jáne de rawajlandırıw máseleleri de dodalandı. Mádeniy-gumanitarlıq qatnasıqlardı bekkemlewge ayrıqsha itibar qaratıldı.
Óz gezeginde, Qasım-Jomart Toqaev Ózbekstan Prezidenti Shavkat Mirziyoevqa qızǵın tileklerin jolladı.

Qaraqalpaqstan xabar agentligi