AQShtıń “IslamiCity” portalı óz betinde Jańa Ózbekstandaǵı diniy taraw reformaları haqqında maqala járiyaladı. Imam Maturidiy xalıqaralıq ilimiy-izertlew orayı direktorınıń orınbasarı Sh.Islamov penen birgelikte tayarlanǵan bul maqalada sońǵı jılları dúnyanıń jetekshi ilimiy orayları hám ekspert toparlarınıń itibarın tartqan másele – Ózbekstandaǵı diniy-aǵartıwshılıq tarawındaǵı reformalar, olardıń tabısqa alıp kelgen faktorları haqqında sóz boladı.

Haqıyqatında da, Ózbekstan Prezidentiniń baslaması menen baslanǵan bul reformalar óziniń xalıqshıllıǵı, barlıq din hám isenim wákilleri ushın teń huqıq hám imkaniyatlardı kepilleytuǵını, xalqımızdıń ázeliy arzıw-niyetlerin ózinde jámlegeni menen ayrıqsha áhmiyetke iye.
Bunday dewimizdiń sebebi, jaqın jıllar ishinde ámelge asırılǵan bul unamlı ózgerisler tek ǵana Ózbekstan ushın emes, al xalıqaralıq jámiyetshilik ushın da paydalı boldı. Mámleketimiz basshısınıń baslaması menen shólkemlestirilgen Imam Buxariy, Imam Maturidiy, Imam Termiziy xalıqaralıq ilimiy-izertlew orayları ámelge asırıp atırǵan iri ilimiy joybarlardıń nátiyjelerinen musılman mámleketleriniń xalıqları da ruwxıy azıq almaqta. Sonıń ishinde, Imam Maturidiy xalıqaralıq ilimiy-izertlew orayınıń ózbek hám arab tillerinde basıp shıǵarılǵan “Kitob at-tavhid”, “Távilot al-Qur‘on” kitapları xalıqaralıq kitap kórgizbelerinde itibarǵa hám tán alıwǵa eristi. Búgin bul kitaplar maturidiya táliymatı menen shuǵıllanıwshı ilimpazlar hám izertlewshilerdiń jumıs stolındaǵı tiykarǵı derekke aylanıp úlgerdi.
Maqalada Ózbekstandaǵı diniy tarawdaǵı reformalar, bárinen burın, nızam ústinligine súyenip, mámleketimizdiń dúnyalıq, demokratiyalıq mámleket ekenine tiykarlanatuǵını atap ótilgen. Sonıń menen birge, hár qıylı din wákillerine ibadat hám máresimlerdi tınısh-tatıw sharayatta, kewil arqayınlıǵında orınlaw, Ózbekstan puqarası sıpatında eldiń rawajlanıwı hám abadanlıǵı jolında hámme qatarında miynet etip, onıń nátiyjesin kóriw imkaniyatı jaratılǵanı búgin dúnyanıń hár qıylı aymaqlarında diniy tiykardaǵı kelispewshilik hám ayırmashılıq keypiyatı kúsheyip atırǵan sharayatta oǵada áhmiyetli ekenine itibar qaratılǵan.

ÓzA