Búgin turmısımız, jumısımızdı baylanıs qurallarısız, málimlemesiz kóz aldımızǵa keltiriw qıyın. Hár bir taraw hám tarmaqta baylanıs hám málimlemelestiriw xızmetleriniń ornı artıp barmaqta. Medicina bolsın, bilimlendiriw bolsın, qarjı-ekonomika yamasa óndiris tarmaǵı bolsın, barlıǵında kompyuter texnologiyaları, baylanıs xızmetlerinen keń hám nátiyjeli paydalanılmaqta. Bul bolsa, álbette, tarawlardıń rawajlanıwına xızmet etiwi menen xalıqqa qolaylıqlar jaratadı, tezlikti arttıradı.
Sonlıqtan da mámleketimizde málimlemelestiriw hám kompyuter programmalastırıw xızmetlerin jedel rawajlandırıwǵa tiykarǵı áhmiyet qaratılmaqta. Bul baǵdarda belgili bir huqıqıy tiykarlar jaratılıp, programmalıq wazıypalar belgilengen.
Milliy statistika komitetiniń maǵlıwmatlarına bola, 2025-jıldıń yanvar-iyun aylarında respublikamızda baylanıs hám málimlemelestiriw xızmetleriniń kólemi 35,3 trillion sumǵa jetken. Bul kórsetkish ótken jıldıń sáykes dáwirine salıstırǵanda 22,1 procent ósti.
Baylanıs hám málimlemelestiriw xızmetleriniń ulıwma kóleminde eń úlken úles kompyuter programmalastırıw xızmetlerine tuwra kelip, 40,7 procentti quraydı. Bul xızmet túri 28,4 procentke ósken.
Demek, elimizde málimlemelestiriw xızmetleri jıldan-jılǵa keńeyip, ósip atırǵanın usı sanlardan da kórinedi. Bul taraw kúndelikli jumısımızdıń ajıralmas bólegine aylanıp úlgergen áhmiyetli tarmaq bolıp esaplanadı.

Muhtarama Komilova,
ÓzA