Ózbekstan Respublikası Ministrler Kabineti “Qaraqalpaqstan Respublikası hám Xorezm wálayatında ayırım kategoriyadaǵı shańaraqlardı taza ishimlik suwı menen támiyinlewge qaratılǵan qosımsha ilajlar haqqında” qarar qabıl etti.

Oǵan muwapıq:
a) Qaraqalpaqstan Respublikası hám Xorezm wálayatında subsidiya alıwshılarǵa artezian qudıǵın qazıw, suw nasosların ornatıw jáne ishimlik suwı filtrlerin satıp alıw hám ornatıw qárejetlerin qaplaw xızmeti “Birden-bir milliy sociallıq qorǵaw” málimleme sisteması arqalı kórsetiledi;
b) “BMSQ” AJda artezian qudıǵı qazıw xızmetlerin kórsetiw, suw nasosı hám ishimlik suwı filtrin satıw jáne ornatıw xalıqtı taza ishimlik suwı menen támiyinlewge járdemlesetuǵın isbilermenlik subektleri reestrine kirgizilgen isbilermenlik subektleri tárepinen ámelge asırıladı. Isbilermenlik subektleri Ózbekstan Respublikası Prezidenti janındaǵı Sociallıq qorǵaw milliy agentligi tárepinen “BMSQ” AJda kirgizilgen ǵalabalıq ofertanı tastıyıqlaw arqalı Reestrge biypul hám ıqtıyarıy tiykarda kirgiziledi;
v) subsidiya alıwshılar tárepinen artezian qudıǵın qazıw, suw nasosları hám ishimlik suwı filtrlerin satıp alıw hám ornatıw xızmetleri “BMSQ” AJ arqalı erkin tańlanadı hám satıp alınadı;
g) subsidiya alıwshılardıń artezian qudıǵın qazıw, suw nasosları hám ishimlik suwı filtrlerin satıp alıw jáne ornatıw qárejetleriniń 90 procenti, biraq bazalıq esaplaw muǵdarınıń 30 esesine shekemgi bólegin qaplaw ushın Mámleketlik byudjet qarjıları esabınan subsidiya ajıratıladı. 2025-jılı Qaraqalpaqstan Respublikası hám Xorezm wálayatındaǵı mútáj shańaraqlarǵa bir márte beriletuǵın materiallıq járdem ushın Mámleketlik byudjetten ajıratılǵan qárejetlerdiń qalǵan bólegi usı ilajlarǵa qaratıladı;
2026-jıldan baslap bul ilajlardı qarjılandırıw ushın qarjılar Ózbekstan Respublikasınıń “Mámleketlik byudjet haqqında”ǵı Nızamında názerde tutıladı.
Subsidiya alıwshılarǵa subsidiya tómendegi shártlerdiń barlıǵı bir waqıttıń ózinde orınlanǵan jaǵdayda ajıratıladı:
subsidiya alıwshılardıń turaq jayında artezian qudıǵı qazıw xızmetleri, suw nasosı hám suw filtrin satıw hám ornatıwǵa baylanıslı jumıslar Reestrge kirgizilgen isbilermenlik subektleri tárepinen ámelge asırılǵan bolsa;
subsidiya alıwshılar tárepinen artezian qudıǵı qazdırılıp, suw nasosı hám ishimlik suwı filtr ornatılǵanı haqqındaǵı usı shańaraqlar jasaytuǵın mákan puqaralar jıyınınıń baslıǵı hám tiyislisinshe Qaraqalpaqstan Respublikası Qurılıs hám turaq jay kommunallıq xojalıǵı ministrligi jáne Xorezm wálayatı Qurılıs hám turaq jay kommunallıq xojalıǵı bas basqarmasınıń juwapker wákilleri tárepinen ornına barǵan halda juwmaq rásmiylestirilgen bolsa;
Usı qarar menen Qaraqalpaqstan Respublikası hám Xorezm wálayatındaǵı ayırım kategoriyadaǵı shańaraqlardı ishimlik suwı menen támiyinlew qárejetlerin qaplaw ushın subsidiya ajıratıw tártibi haqqındaǵı reje tastıyıqlandı.
Rejede:
subsidiya alıwshılar tárepinen elektron sawda platforması arqalı artezian qudıǵın qazıw, suw nasosların ornatıw hám ishimlik suwı filtrlerin satıp alıw boyınsha buyırtpalar beriw;
subsidiya alıwshılardıń turaq jayında artezian qudıǵı qazılǵanı, suw nasosları ornatılǵanı hám ishimlik suwı filtrleri satıp alınıp, ornatılǵanın úyreniw;
subsidiya alıwshılarǵa olardıń jasaytuǵın jerinde artezian qudıǵın qazdırıw, suw nasosların ornatıw hám ishimlik suwı filtrlerin satıp alıp, ornatıw qárejetlerin qaplaw ushın subsidiya ajıratıw tártibi belgilep berilgen.

ÓzA