Pediatrdiń aytıwınsha, nadurıs tańlanǵan yamasa hádden tıs awır portfel (durısıraǵı, ryukzak) súyek-bulshıq et sisteması ele qáliplesiw procesinde bolǵan balalar hám jas óspirimlerdiń tek ǵana qáddi qawmetine emes, al ishki aǵzalarınıń is-háreketine de unamsız tásir etiwi múmkin.

Sonıń ushın ryukzak tańlaw hám onı alıp júriwge ayrıqsha itibar qaratıw kerek.
Sumka yamasa ryukzaktı bárqulla bir iyinde kóteriw skoliozdı qáliplestiriwi múmkin. Awır ryukzak iyin belbewi hám beldi zorıqtıradı, aqıbetinde bala aldıǵa yamasa qaptalǵa eńkeyip júriwge májbúr boladı, bunıń aqıbetinde ishki aǵzalardıń qısılıwı, qan aylanıwınıń buzılıwı, dem alıwdıń qıyınlasıwı, júrek soǵıwınıń tezlesiwi hám bas aylanıwı sıyaqlı unamsız jaǵdaylar kelip shıǵıwı múmkin.
Hádden tıs zorıǵıw, qalaberse, ayaqlarǵa da zıyanlı: júriwdi qıyınlastırıwdan tısqarı, ayaq hám bel awırıwın keltirip shıǵaradı, ayaq buwınlarında patologiyalıq ózgerislerge alıp keliwi múmkin.
Júklemeni azaytıw ushın ryukzak balanıń iyin keńliginde, joqarı sheti iyin biyikliginde, tómengi sheti bel biyikliginde bolıwı kerek. Bawları jumsaq hám keń (4-8 sm), sazlanıwshı bolıwı kerek. Jolda qáwipsizlik ushın jaqtılıqtı qaytarıwshı elementlerdiń bolıwı maqsetke muwapıq.
Ryukzaktıń salmaǵı:
– baslawısh klass oqıwshıları ushın – 700 grammǵa shekem;
– orta hám joqarı klasslar ushın – 1 kilogrammǵa shekem bolıwı kerek.
Sabaqlıqlar hám oqıw qurallarınıń salmaǵı tómendegi normadan aspawı kerek:
1-2-klasslar – 1,5 kg;
3-4-klasslar – 2 kg;
5-6-klasslar – 2,5 kg;
7-8-klasslar – 3,5 kg;
9-11-klasslar – 4 kg-, dep málimleme beredi xabar.uz saytı.

Qaraqalpaqstan xabar agentligi