Iran Islam Respublikası jetekshisi Masud Pezeshkiyon Izrail bas ministri Binyamin Netyanyaxudıń mámlekettegi suw jetispewshiligin sheshiw boyınsha járdem usınısın keskin sınǵa aldı. Onıń sózlerine bola, Gaza xalqın suw hám azıq-awqattan ayırıp atırǵan mámlekettiń bunday wádeleri “tek ǵana qıyalıy sózler bolıp tabıladı”.

Netyanyaxu siyshembi kúni iranlılarǵa jollaǵan videomúrájatında Irannıń awır suw tamtarıslıǵın sheshiwge járdem beretuǵının ayttı.
Pezeshkiyon bolsa húkimet májilisinde buǵan juwap retinde “Jalǵan miyrim-shápáát kórsetiwden aldın Gaza hám ol jerdegi qorǵawsız xalıqqa, ásirese, balalardıń jaǵdayına ashınsın” dep atap ótti.
Bizge belgili, Iran házirgi waqıtta suwdıń keskin jetispewshiligi hám elektr energiyasınıń jetispewshiligine dus kelmekte. Húkimet ıssı tolqınlar hám artıp baratırǵan energiya tutınıwı sebepli mámlekettiń úlken bóleginde mámleketlik uyımlar hám banklerdi waqtınsha jabıwǵa májbúr boldı.
Házirgi waqıtta Tegeranda hawa temperaturası 40°S tan artpaqta. Xalıqqa kúnniń eń ıssı waqıtlarında dalaǵa shıqpaw, suw hám elektrden únemli paydalanıw usınıs etildi. Elimizde saatına 62 mıń megavatt elektr islep shıǵarılmaqta, biraq talap 80 mıń megavattı quraydı. Házirgi eki saatlıq gezekpe-gezek elektr úzilisleri jaqında tórt saatqa shekem sozılıwı múmkin.
Pezeshkiyonniń sózlerine bola, suw rezervleri “ayaq astında da, plotinalar artında da qalmaǵan” hám mámleket “awır krizis”ke dus kelgen. Házirgi waqıtta qánigeler menen mashqalanı sheshiw jolların izlemekte.

Musulmon Ziyo, ÓzA