Ferǵana wálayatı hám Qaraqalpaqstan Respublikası arasındaǵı ekonomikalıq birge islesiw nátiyjesinde mıńlaǵan jańa jumıs orınları jaratıldı, óndiristiń túrli baǵdarları ashıldı. Bizge belgili, Ózbekstan Respublikası Prezidentiniń baslaması menen Qaraqalpaqstannıń qala hám rayonları mámleket wálayatlarına biriktirilgen. Sonıń ishinde, Bozataw rayonında ekonomikalıq reformalardı ámelge asırıwda Ferǵana wálayatı birge islespekte. Biraq qatnasıqlar sociallıq tarawlar, mádeniyat, sport, turizm baǵdarların da qamtıp aldı. Mine úsh jıldan berli, qaraqalpaq miynet veteranları hám balaları jazǵı dem alıs waqtında Ferǵana wálayatındaǵı sanatoriy hám balalar dem alıw orınlarında dem aladı. Usı kúnlerde bolsa Ferǵana rayonınıń “Tań” balalar dem alıw orayı 50 qaraqalpaqstanlı oqıwshını qabıl etken.
– Men Bozataw rayonınanman. Fergana júdá gózzal hám salqın eken. Dem alıw orayında kóplegen doslar arttırdım. Bul jer maǵan júdá unadı, – deydi Zarina Rahimberdieva.
– Ótken jılı jazda klasslaslarım Ferǵanaǵa kelip dem alǵan edi. Olardıń tásirlerin esitip, bıyıl men de keldim. Ferǵana, “Tań” lageri zor eken. Barlıq shólkemlestiriwshilerge úlken raxmet, – deydi Gúljamal Qwshbergenova.
“Tań” wálayattıń eń sulıw CHimyon awılında jaylasqan. Bir mártelik qabıllaw waqtında 200 bala dem aladı. Bul jerde olar ushın barlıq sharayat jaratılǵan. Hár qıylı dógerekler, sport maydanshaları, intellektuallıq sabaq xanaları, kitapxana, basseyn bar.
– Ferǵanadaǵı dem alıw orınları ótken jılı da qaraqalpaq balaların bawırına basqan edi. Baǵdarlamaǵa bola, qaraqalpaq nama hám qosıqları, ayaq oyınları kórsetiletuǵın ayrıqsha kún bar. Olar awızbirshilikli, tatıw hám baxıtlı ekeninen quwanıshlımız, – deydi Jaslar agentligi Bozataw rayonlıq bóliminiń juwaplı xızmetkeri Adilbay Zoirov.
Kóp milletli Ózbekstan xalıqları tatıw hám awızbirshilikte jasamaqta. “Kúsh – birlikte” degen súren usınday ilajlarda jaslardıń turmısına da sińip baradı.

Muhammadjon Obidov, Elyor Olimov (surat, video), ÓzA