Usı jıldıń 14-avgust kúni Senattıń Agrar, suw xojalıǵı máseleleri hám ekologiya komitetiniń májilisi bolıp ótti.
Bul haqqında senat.uz xabar bermekte.

Komitet aǵzaları tárepinen “Ózbekstan Respublikasınıń ayırım nızam hújjetlerine qosımshalar hám ózgerisler kirgiziw haqqında”ǵı nızam dáslepki tárizde kórip shıǵıldı.
Atap ótilgenindey, mámleketimizde qorshaǵan ortalıqtı qorǵaw, ekologiyalıq qáwipsizlikti támiyinlew, tábiyǵıy resurslardan aqılǵa uǵras paydalanıw hám ekologiyalıq jaǵdaydı jaqsılaw boyınsha sistemalı jumıslar alıp barılmaqta.
Sonday-aq, respublikamızda milliy hám sırt elli paydalanıwshılar ushın rásmiy statistika maǵlıwmatlarınıń ashıq-aydınlıǵın hám járiyalılıǵın eń joqarı dárejede támiyinlew, sonıń ishinde, ekonomika tarmaqlarınıń rawajlanıw kórsetkishleri haqqındaǵı maǵlıwmatlardan paydalanıw imkaniyatların keńeytiw boyınsha sistemalı jumıslar ámelge asırılmaqta.
Usı Nızam menen “Tábiyattı qorǵaw haqqında”ǵı hám “Shıǵındılar haqqında”ǵı nızamlarǵa qurılısta paydalanıw ushın mólsherlengen qurılıs aynasınan paydalanıw nátiyjesinde payda bolatuǵın shıǵındılardı qayta islew qárejetlerin qaplaw ushın utilizaciya jıyımın engiziwdi názerde tutatuǵın jáne ayırım nızamlarǵa Ózbekstan Respublikası Milliy statistika komitetiniń ataması hám huqıqıy statusınıń ózgertiliwin názerde tutatuǵın qosımshalar hám ózgerisler kirgizilmekte.
Nızamnıń qabıl etiliwi qurılıs aynası sanaatın rawajlandırıwǵa, onıń qorshaǵan ortalıqqa unamsız tásirin azaytıwǵa, qurılıs aynalarınıń sapasın jáne de jaqsılawǵa, sonday-aq, mámlekettiń rásmiy statistika tarawındaǵı hákimshilik reformalardı nátiyjeli ámelge asırıw sheńberinde statistika uyımlarınıń jumısın jetilistiriwge hám rásmiy statistikadan paydalanıwshılar ushın jáne de qolaylı sharayatlar jaratıwǵa xızmet etedi.
Májiliste awıl xojalıǵın rawajlandırıw, ilimiy-izertlew institutlarınıń materiallıq-texnikalıq bazasın bekkemlew hám tarawǵa ilim jetiskenliklerin engiziw boyınsha Ministrler Kabinetine jiberilgen parlamentlik soraw nátiyjeleri de dodalandı.
Senatorlar tárepinen jiberilgen soraw nátiyjesinde belgili bir jumıslardıń ámelge asırılǵanlıǵı atap ótildi.
Sonıń ishinde, awıl xojalıǵında bilim hám innovaciyalar milliy orayı sistemasındaǵı ilimiy-izertlew mákemeleri tárepinen ilimiy jumısqa baylanıslı mámleketlik baǵdarlamalar sheńberinde ulıwma bahası 49,7 milliard sum bolǵan 49 ámeliy, 7 innovaciyalıq, 1 fundamental, 12 xalıqaralıq joybar boyınsha izertlewler alıp barılmaqta.
Ilimiy-izertlew institutlarında topıraq ónimdarlıǵın saqlaw hám arttırıwǵa qaratılǵan qısqa rotaciyalı almaslap egiw sisteması islep shıǵılǵan hám institutlardıń wálayatlardaǵı ilimiy-izertlew stanciyaları hám tuqımgershilik tájiriybe xojalıqlarında 70 ten aslam jańa ǵawasha sortlarınıń baslanǵısh tuqımgershiligi shólkemlestirilgen.
Sonıń menen birge, “Sabzavot nav uruǵlari” óndirislik kooperaciyası shólkemlestirilip, ovoщ hám palız eginleri sort hám gibridleriniń tuqımların islep shıǵarıw jolǵa qoyılǵan jáne hár qıylı ekstremal sharayatlarǵa shıdamlı bolǵan masaqlı hám sobıqlı dán eginleri sortların jaratıw maqsetinde “In vitro-seeds” kompleksi shólkemlestirilgen.
Sonday-aq, awıl xojalıǵı eginleriniń tuqımgershiligi jolǵa qoyılıp, agroklasterler, fermerler hám basqa da islep shıǵarıwshılar menen xojalıq shártnamaları tiykarında ilimiy qollanbalar engizilgen.
Májilis juwmaǵında kórip shıǵılǵan máseleler boyınsha Komitettiń tiyisli qararları qabıl etildi.
***
Usı kúnniń ózinde xalıq deputatları jergilikli Keńesleriniń Agrar, suw xojalıǵı hám ekologiya máseleleri boyınsha turaqlı komissiyalarınıń aǵzaları ushın oqıw-seminarı ótkerildi.
Seminarda turaqlı komissiyalardıń jumısın nátiyjeli shólkemlestiriw, olardıń tiykarǵı baǵdarları boyınsha anıq rejelerdi belgilew, wákillikleri sheńberinde áhmiyetli máselelerdi dodalaw hám anıq nátiyjelerge erisiw boyınsha tájiriybe almasıldı.
Komitet aǵzaları tárepinen jergilikli Keńeslerdiń turaqlı komissiyaları aǵzalarınıń tarawǵa baylanıslı nızamshılıqtaǵı jańalıqlar, ózgerisler boyınsha bilim hám kónlikpelerin arttırıp barıw, tarawǵa baylanıslı nızamlardı kórip shıǵıwda olardıń pikirin alıw zárúr ekenligi aytıp ótildi.
Sonday-aq, awıl xojalıǵın reformalaw hám rawajlandırıw, azıq-awqat qáwipsizligin támiyinlew, eginlerdi suwǵarıwda suwdı únemleytuǵın texnologiyalardı engiziw hám tarawda jańa jumıs orınların jaratıw, qorshaǵan ortalıqtı qásterlep saqlaw, júzege kelip atırǵan mashqalalar hám olardı óz waqtında sheshiw boyınsha usınıslar islep shıǵıw sıyaqlı wazıypalar belgilep alındı.
Ilajda jergilikli Keńeslerdiń turaqlı komissiyalarınıń aǵzaları óz pikir-usınısların bildirdi.

Qaraqalpaqstan xabar agentligi