Mámleketimizde Prezident Shavkat Mirziyoevtiń baslaması tiykarında diniy-aǵartıwshılıq tarawlarda alıp barılıp atırǵan reformalar, unamlı ózgerisler xalıqaralıq kólemde de joqarı tán alınbaqta.

Dúnya musılmanları turmısına baylanıslı eń isenimli hám qalıs maǵlıwmatlar járiyalanatuǵın belgili “Islamonweb” portalında Malayziya xalıqaralıq islam universitetiniń professorı Shukran Abdulrahmon hám Imam Moturidiy xalıqaralıq ilimiy-izertlew orayı direktorınıń orınbasarı Shahzod Islomovtıń “Ilim – milliy rawajlanıw hám global tınıshlıqtıń bekkem tiykarı” atamasındaǵı maqalası járiyalandı.
Maqalada atap ótilgenindey, bay ilimiy-ruwxıy tiykarǵa iye Jańa Ózbekstanda sońǵı jılları xalıqaralıq ilimiy jámiyetshiliktiń itibarın ózine tartqan áhmiyetli reformalar ámelge asırılmaqta.
Ózbekstan milliy qádiriyatlar, tariyxıy tájiriybe hám zamanagóy bilimlerdi úylestiriw arqalı turaqlı rawajlanıwǵa umtılmaqta. Bul eldegi barlıq unamlı ózgerisler xalıqtıń talap hám tileklerine tiykarlanıp, keńpeyillik, rawajlanıw hám aǵartıwshılıq principlerine sadıq qalǵan halda alıp barılmaqta.
Maqalada jazılıwınsha, Ózbekstan Respublikası Prezidenti Shavkat Mirziyoevtiń ideyası tiykarında shólkemlestirilgen Xalıqaralıq islamtanıw akademiyası, Imam Buxariy, Imam Maturidiy, Imam Termiziy xalıqaralıq ilimiy-izertlew orayları, Hadis ilimi mektebi, Mir Arab joqarı medresesi qısqa waqıt ishinde úlken ilimiy joybarlardı ámelge asırıp, Ózbekstannıń ilimiy-aǵartıwshılıq orayı sıpatındaǵı xalıqaralıq imidjin arttırıwǵa xızmet etpekte.

N.Usmonova,
ÓzAnıń xabarshısı