Totı quslar tek gózzallıǵı menen emes, al aqıl-parasatı menen de insanlarǵa jaqın bolǵan quslar qatarına kiredi. Reńli párleri, úyreniwge qumarlıǵı, insan tiline uqsas seslerdi tákirarlaw qábileti sebepli totı quslar pútkil dúnyada úy haywanı sıpatında keń tarqalǵan. Ózbekstanda da bul quslarǵa bolǵan qızıǵıwshılıq jıldan-jılǵa artıp barmaqta.

Milliy statistika komitetiniń maǵlıwmatlarına bola, 2025-jıldıń yanvar-iyun aylarında Ózbekstanǵa 6 sırt elden 765 dana totı qus import etilgen. Bul quslar ushın jumsalǵan ulıwma qarjı 20,1 mıń AQSh dolların quraǵan. 2025-jılı mámleketimizge eń kóp totı qusı jetkerip bergen mámleketler tómendegiler: Senegal – 320 dana, Belgiya – 186 dana, Germaniya – 159 dana, Niderlandiya – 74 dana, Tájikstan – 20 dana hám CHexiya – 6 dana.
Senegal usı dáwir dawamında totı qus jetkerip beriwshi jetekshi mámleketke aylanǵan. Afrikanıń bul mámleketi tiykarınan tropikalıq klimatlı aymaqlarda keń tarqalǵan totı qus túrlerine iye bolıp, olar Ózbekstandaǵı úy haywanları ıqlasbentleri arasında talap joqarılıǵın kórsetpekte.
Totı quslarǵa bolǵan talaptıń joqarılıǵın bir neshe sebepler menen túsindiriwimiz múmkin. Bárinen burın, Ózbekstan puqaraları arasında ájayıp úy haywanlarına qızıǵıwshılıq artpaqta. Ásirese, balalar hám jaslarda totı quslardı úyde baǵıw ádewir dástúr bolgan. Qalaberdi, totı quslar sózlerdi eslep qalıw, tákirarlaw, oyın oynaw qábiletine iye bolıp, bul olardı ápiwayı quslardan ajıratıp turadı.
Ózbekstanda totı quslarǵa bolǵan talaptıń artıp baratırǵanı statistikalıq sanlarda da ayqın sáwlelenbekte. Bul quslardıń aqılı, sulıw hám interaktiv ózgeshelikleri olardı kópshilik ushın qızıqlı etedi. Keleshekte bul tarawǵa tiyisli nızamshılıq, salamatlandırıw, kóbeytiw hám eksportqa baǵdarlanǵan strategiyalar islep shıǵılsa, totı quslar tek ǵana úy haywanı emes, al ekonomikalıq payda dáregine de aylanıwı múmkin.

Dildora DWSMATOVA,
ÓzA