Parlamenttiń Tómengi palatasınıń májilisinde orınlaw jumısın júrgiziwdiń ápiwayılastırılǵan tártibin bunnan bılay da jetilistiriwge qaratılǵan nızam joybarı dodalandı.

Nızam joybarı menen ápiwayılastırılǵan tártipte orınlanatuǵın orınlaw isleri kategoriyası keńeytilmekte. Atap aytqanda, videokonferencbaylanıs qárejetlerin, kommunallıq xızmetler hám kóp kvartiralı turaq jaylar múlk iyeleriniń májbúriy tólemlerin yamasa tólemler boyınsha qarızdarlıqlardı, sonday-aq, bazalıq esaplaw muǵdarınıń bes esesinen kóp bolmaǵan muǵdardaǵı orınlaw hújjetlerin ápiwayılastırılǵan tártipte orınlaw názerde tutılmaqta.
Dodalawlarda joybardı ekinshi oqıwǵa tayarlaw procesinde juwapker komitet tárepinen bir qatar jumıslar ámelge asırılǵanı atap ótildi. Atap aytqanda, parlamenttegi oppoziciya frakciyası aǵzalarınıń usınıslarınan kelip shıǵıp, ápiwayılastırılǵan tártipte orınlanatuǵın joqarıdaǵı jumıslar boyınsha óndiriw qarızdar fizikalıq táreptiń banklerdegi esap betlerinde turǵan pul qarjılarına qaratılmawı belgilenbekte.
Májiliste nızam joybarında belgilenetuǵın normalar óndiriwdiń nátiyjeliligin arttırıw, quramalı bolmaǵan orınlaw hújjetleri boyınsha qarızdarlardıń jasaw ornına barıp, olardı artıqsha tınıshsızlandırıw jaǵdaylarınıń aldın alıw hám qarızdarǵa sheklew hám qadaǵan etiwlerdi qollanbaǵan halda óndiriwdi ámelge asırıwǵa imkaniyat jaratatuǵını atap ótildi.
Dodalawlar hám soraw-juwaplardan soń, nızam joybarı deputatlar tárepinen qabıl etildi,-dep málimleme beredi xabar.uz saytı.

Qaraqalpaqstan xabar agentligi