Ózbekstan Respublikası Prezidenti Shavkat Mirziyoev 14-avgust kúni mámleketimizdegi diplomatiyalıq missiyasın juwmaqlap atırǵan Franciya Respublikasınıń Ayrıqsha hám tolıq huqıqlı elshisi Oreliya Bushezdi qabılladı.

Mámleketimiz basshısı Franciya elshisiniń nátiyjeli jumısı hám mámleketlerimiz arasındaǵı strategiyalıq sheriklik qatnasıqların rawajlandırıw hám bekkemlewge qosqan jeke úlesin ayrıqsha atap ótti.
Bolıp ótken joqarı dárejedegi óz-ara sapar etiwler Ózbekstan-Franciya birge islesiwin sapa jaǵınan jańa basqıshqa kóteriw, onıń kún tártibin anıq mazmun menen bayıtıwǵa xızmet etkeni atap ótildi.
Hár qıylı dárejelerde sistemalı sóylesiw hám jedel baylanıslar jolǵa qoyılǵan. Sawda-ekonomikalıq tarawda sezilerli tabıslarǵa erisildi. Keyingi jılları tovar almasıw 4 esege kóbeydi, Franciyanıń jetekshi kompaniyaları hám shólkemleri menen ulıwma bahası 10 milliard dollardan aslam joybarlar ámelge asırılmaqta.
Bilimlendiriw, densawlıqtı saqlaw hám mádeniy-gumanitarlıq almasıw tarawlarında áhmiyetli baǵdarlamalar ámelge asırılmaqta. Luvr muzeyi hám Arab dúnyası institutında kórgizbeler úlken tabıs penen ótti.
Parij qalası janında Beruniy esteligi ashıldı. Franciya paytaxtındaǵı kóshege Samarqand atı berildi. Usı jılı Tashkent qalasında Ózbekstan-Franciya universiteti óz jumısın baslaydı.
Ushırasıw juwmaǵında Ózbekstan Prezidenti Franciyanıń Ayrıqsha hám tolıq huqıqlı elshisi Oreliya Bushezge mámleketlerimiz arasında doslıq hám strategiyalıq sheriklik qatnasıqların bekkemlewge qosqan úlken úlesi ushın “Dwstlik” ordenin tapsırdı.
Elshi xanım onıń diplomatiyalıq missiyası joqarı bahalanǵanı hám Ózbekstan menen Franciya arasındaǵı keń kólemli birge islesiwdi rawajlandırıwdı hár tárepleme qollap-quwatlap atırǵanı ushın mámleketimiz basshısına shın júrekten minnetdarshılıq bildirdi.

ÓzA