Ózbekstan “Milliy tiklanish” demokratiyalıq partiyası Qaraqalpaqstan Respublikası Keńesiniń II Plenumı bolıp ótti.
Oǵan partiyanıń Qaraqalpaqstan Respublikası Keńesiniń aǵzaları, qalalıq hám rayonlıq Keńesleriniń baslıqları, Qaraqalpaqstan Respublikası Joqarǵı Keńesi hám xalıq deputatları jergilikli Keńeslerindegi deputatlıq toparlarınıń aǵzaları, partiya belsendileri hám ǵalaba xabar qurallarınıń wákilleri qatnastı.

Plenumdı ÓzMTDP Qaraqalpaqstan Respublikası Kenesiniń baslıǵı T.Romanov alıp bardı.
Plenumda barlıq dárejedegi partiya shólkemleri hám deputatlıq birlespeleri tárepinen 2025-jıldıń birinshi yarım jıllıǵı dawamında alıp barılǵan jumıs nátiyjeleri hám 2025-2029-jıllarǵa mólsherlengen Saylawaldı baǵdarlamasında belgilengen wazıypalardıń orınlanıwın támiyinlew, sonday-aq, partiyanıń Qaraqalpaqstan Respublikası Keńesi hám Joqarǵı Keńestegi partiya frakciyasınıń Is-rejesin tastıyıqlaw máseleleri dodalandı.
Plenumda shıǵıp sóylegenler itibarın, partiya shólkemleri tárepinen alıp barılǵan jumıslar, jetiskenlikler hám kemshiliklerge qaratıp, partiyanıń Saylawaldı platformasında belgilengen wazıypalardıń orınlanıwı, partiyanıń baǵdarlamalıq maqset hám wazıypaların ámelge asırıw, elektorat máplerin qorǵaw sıyaqlı máseleler de kórip shıǵıldı.
Atap ótilgenindey, búgingi kúnge kelip, partiyanıń Qaraqalpaqstan Respublikası boyınsha baslanǵısh partiya shólkemleriniń sanı 680, partiya aǵzalarınıń sanı bolsa 51268 di quramaqta.
Partiya óz aldına qoyǵan maqset hám wazıypalardı ámelge asırıw boyınsha ótken jılı 271 joybar, akciya, seminar hám ilajlar ótkerip, olarda 18 mıńnan aslam puqara qatnastı.
Atap aytqanda, partiya wákilleri tárepinen “Úyme-úy,” “Xızmet – biyǵárez,” “Taza tarelka,” “Siyasatshı hayal-qızlar klubı” hám basqa da partiyanıń saylawaldı baǵdarlamasınan kelip shıǵıp ilajlar turaqlı túrde ótkerilip kelinbekte.
Ótken esap beriw dáwirinde elektorat máplerin qorǵaw maqsetinde Qaraqalpaqstan Respublikası Joqarǵı Keńesindegi partiya frakciyası tárepinen jámi 44 deputatlıq soraw ámelge asırılıp, 6 márte lawazımlı shaxstıń esabatları tıńlandı. Joqarǵı Keńes Prezidiumına 12 másele kirgizilgen.
Xalıq deputatları jergilikli Keńeslerindegi ÓzMTDP deputatlıq toparlarınıń aǵzaları tárepinen jámi 85 deputatlıq soraw ámelge asırıldı. Partiya deputatlıq toparları tárepinen 6 lawazımlı shaxstıń esabatları tıńlandı. Turaqlı komissiya májilislerine 22 másele, jergilikli Keńeslerdiń sessiyalarına 5 baslama alıp shıǵıldı. Deputatlar tárepinen jiberilgen jámi 129 deputatlıq sorawdıń 94 i, yaǵnıy 73 procenti unamlı sheshilgen, qalǵanları boyınsha huqıqıy túsinikler berilgen.
Ótken 6 ay dawamında Ózbekstan “Milliy tiklanish” demokratiyalıq partiyası Qaraqalpaqstan Respublikası, qalalıq hám rayonlıq Keńeslerine puqaralarımız tárepinen 36 márte múrájat kelip túsken. Sonnan 10 múrájat tiyisli uyım hám shólkemlerge jiberildi. Qalǵan 26 múrájat óz waqtında unamlı sheshildi.
Jaslardıń bántligin támiyinlew, olardı kásip-ónerge baǵdarlaw, “Ustaz-shákirt” dástúrlerin rawajlandırıw maqsetinde máhállelerde jasap atırǵan jámlespegen jaslar, kem támiyinlengen shańaraqlardıń perzentleri, waqtınsha jumıssız hayal-qızlarǵa qosımsha biypul kásip-óner úyretiw ushın “Xızmet-biyminnet” joybarı sheńberinde ótken jıl dawamında Qaraqalpaqstan Respublikası boyınsha 8 biypul oqıw kursları shólkemlestirildi. Oqıw kurslarında 54 jas hám hayal-qızlarǵa qosımsha biypul bilim hám kásip-óner úyretildi. Bul biypul kurslar 2025-jıldıń keyingi dáwirinde de shólkemlestiriletuǵını belgilendi.
Deputat óz wákilliklerinen nátiyjeli paydalanǵan halda intakerlikti bunnan bılay da arttırıwı zárúrligi ayrıqsha atap ótildi.
Plenumda partiyanıń Qaraqalpaqstan Respublikası Keńesiniń 2025-jıldıń birinshi yarım jıllıǵı ushın belgilengen Is-rejesi hám ámelge asırılatuǵın tiykarǵı wazıypalardı orınlaw baǵdarında dodalanǵan máseleler boyınsha tiyisli qarar qabıl etildi.

Qaraqalpaqstan xabar agentligi