Ekonomika hám qarjı ministrliginde Túrkiya birge islesiw hám muwapıqlastırıw agentligi (TİKA)niń Ózbekstandaǵı wákilxanası basshılıǵı menen ushırasıw bolıp ótti.

Ushırasıwda tárepler arasındaǵı birge islesiwdi jáne de rawajlandırıw, sonıń ishinde, altı tiykarǵı baǵdar boyınsha jergilikli kárxanalardıń wákillerin Túrkiya standartları tiykarında mamanlıǵın arttırıwǵa qaratılǵan oqıw-treningler shólkemlestiriw máseleleri dodalandı. Sonıń menen birge, TİKA grantların tartqan halda basqa potenciallı baǵdarlarda keń kólemli birge islesiwdi ámelge asırıw boyınsha anıq usınıslar ortaǵa qoyıldı hám keyingi qádemler belgilep alındı.
Sóylesiwlerde energiya nátiyjeliligin arttırıw, urbanizaciya processlerin qollap-quwatlaw, suw resurslarınan nátiyjeli paydalanıw, xızmetler tarawın rawajlandırıw hám basqa da baǵdarlarda birge islesiw perspektivaları ayrıqsha atap ótildi.
Ministrlik málimleme xızmetiniń xabarına bola, TİKA – Túrkiya Respublikasınıń rásmiy rawajlanıw birge islesiw agentligi bolıp, 1992-jılı shólkemlestirilgen. Búgingi kúnde TİKA 60 tan aslam mámlekette 60 tan aslam muwapıqlastırıw ofislerine iye. Agentliktiń tiykarǵı maqseti Túrkiya hám birge islesiwshi mámleketler arasında ekonomikalıq, mádeniy, bilimlendiriw, densawlıqtı saqlaw hám texnikalıq birge islesiw tarawlarında joybarlardı ámelge asırıw bolıp esaplanadı.
Ushırasıwda 2025-jılı Tashkent hám Ankara qalalarında ministrlik hám onıń sistemasındaǵı shólkemlerdiń xızmetkerleri ushın TİKA menen birgelikte bir qatar mamanlıq arttırıw hám oqıw baǵdarlamaları shólkemlestirilip atırǵanı da qanaatlanıwshılıq penen atap ótildi.
Ushırasıw juwmaǵında tárepler óz-ara birge islesiw baylanısların jáne de rawajlandırıw, dodalanǵan joybar hám baslamalardı ámelge asırıwdı jedellestiriw boyınsha ilajlardı nátiyjeli hám sistemalı dawam ettiriwge kelisip aldı.

N. Ziyodullaeva, ÓzA