Ózbekstannıń Jáhán sawda shólkemine (JSSh) tolıq aǵza bolıwı mámleket ekonomikasın liberallastırıw jolındaǵı tiykarǵı baǵdarlardan biri bolıp esaplanadı. Bul xalıqaralıq shólkemge aǵzalıq Ózbekstannıń kóp tárepleme sawda sistemasına qosılıwında, sırtqı sawda siyasatında úlken áhmiyetke iye bolıp, ádil sawda sistemasın jolǵa qoyıw imkaniyatın beredi. Sol sebepli mámleketimizde Jáhán sawda shólkemine aǵza bolıw processleri jedel alıp barılmaqta. Milliy nızamshılıqtı oǵan cáykeslendiriw, tártip hám standartlardı xalıqaralıq talaplarǵa beyimlestiriw boyınsha jumıslar ámelge asırılmaqta.

Paytaxtımızda 13-16-avgust kúnleri Oliy Majlis Nızamshılıq palatasınıń deputatları hám bir qatar mámleketlik uyımlardıń wákilleri qatnasıwında Jáhán sawda shólkeminiń huqıqıy sisteması hám usı sistemanıń nızamshılıq processleri máselelerine baǵıshlanǵan seminar-trening bolıp ótpekte.
Trening Nızamshılıq palatasınıń Nızamshılıqtı JSSh kelisimlerine sáykeslendiriw boyınsha komissiyası hám Ózbekstan Respublikası Prezidentiniń Jáhán sawda shólkemi máseleleri boyınsha wákili menen birgelikte “Ózbekstannıń JSShǵa aǵza bolıw procesine járdemlesiw” joybarı sheńberinde shólkemlestirildi. Konferenciyadan gózlengen maqset xalıqaralıq sawdanı huqıqıy tártipke salıw, JSSh huqıqıy sistemasınıń tiykarları, sonday-aq, milliy nızamshılıqtı JSSh kelisimleriniń qaǵıydalarına beyimlestiriw máseleleri boyınsha seminar qatnasıwshılarınıń potencialın arttırıwdan ibarat.
Seminar-treningte JSSh máseleleri boyınsha xalıqaralıq dárejedegi ekspertler – JSSh Apellyaciya uyımınıń burınǵı aǵzası, bir qatar xalıqaralıq sawda kelispewshiliklerinde kollegiya aǵzası bolǵan professor Piter Van den Bosh, uzaq jıllar dawamında JSSh sistemasında túrli basshı lawazımlarda jumıs alıp barǵan sawda máseleleri boyınsha másláhátshisi Hamid Mamdu, sonday-aq, xalıqaralıq sawda máselelerinde 35 jıldan artıq waqıt dawamında jumıs alıp barıp atırǵan AShQtaǵı Djons Xopkins universiteti professorı hám xalıqaralıq sawda máselelerine qánegilesken “Appleton Luff” advokatlıq firmasınıń tiykarın salıwshı Artur Appltonlar qatnaspaqta. Sonday-aq, Nızamshılıq palatası Spikeriniń orınbasarı, deputatlar hám Ózbekstan Respublikası Prezidentiniń Jáhán sawda shólkemi máseleleri boyınsha wákili, Ózbekstannıń JSShǵa aǵzalıǵı boyınsha sóylesiwshiler toparınıń aǵzaları, “intellekt orayları”nıń wákilleri qatnaspaqta.
Trening dawamında qatnasıwshılar xalıqaralıq sawdadaǵı tarif, sonday-aq, texnikalıq tártipke salıw, sanitariyalıq hám fitosanitariyalıq ilajlar, subsidiyalaw hám demping máseleleri sıyaqlı tarif emes ilajlar boyınsha tiykarǵı qaǵıydalar, olardı qollanıw, xalıqaralıq xızmetler sawdasın tártipke salıwdıń ózine tánligi, xalıqaralıq sawdanıń intellektuallıq múlk huqıqı menen baylanıslı jaqları, JSSh sheńberinde xalıqaralıq ekonomikalıq kelispewshiliklerdi sheshiw boyınsha tolıq maǵlıwmat alıw imkaniyatına iye bolmaqta.
Seminarda Ózbekstannıń JSShǵa aǵza bolıw procesin juwmaqlawda nızamshılıq reformalarınıń ornı, bul baǵdarda nızam dóretiwshiligi máselesinde aldınǵı xalıqaralıq tájiriybeler haqqında pikir alısıldı.

Muhtarama Komilova, ÓzAnıń xabarshısı