Ózbekstan Respublikası ǵárezsizliginiń 34 jıllıǵı aldınan Taqıyatas rayonında da keń kólemli reformalar alıp barılıp, qurılıs tarawında úlken ózgerisler ámelge asırılmaqta. Ásirese, rayonnıń ishki jolları, sonıń ishinde Sharaf Rashidov kóshesindegi ózgerislerdi kórip kewliń quwanıshqa toladı.

Házirgi waqıtta Baslamalı byudjet joybarı sheńberinde rayon aymaǵındaǵı 4 máhálle aymaǵınan ótiwshi ishki jollardıń 1 kmden zıyat bóleginde asfaltlaw jumısları juwmaqlandı.
Maǵlıwmat ushın, rayon boylap 8 lot 7,6 km jolda qara qaplamalı asfalt tósew rejelestirilgen. Bul jol tek ǵana ápiwayı jol emes, al bul joldan ótiwshi puqaralardıń qáwipsizligin támiyinleydi.
Usınday unamlı ózgerisler qatarında ishimlik suw tarmaǵındaǵı avariyalıq jaǵdaylardı saplastırıw maqsetinde eski suw qubırları da jańasına almastırılmaqta. Sonday-aq, Abat mákan máhállesi aymaǵında 120 metr aralıqta rekonstrukciya jumısları ámelge asırılmaqta.
Sonday-aq, bayram aldınan rayon xalqınıń abadanlıǵı ushın zamanagóy túngi jaqtılandırıwlar, videobaqlaw qurılmaları, qáwipsiz jollardı da qurıw belgilengen. Rayon boylap jámi 1 km aralıqtaǵı eski qubırlar jańa qubırlarǵa almastırıladı. Bul arqalı ishimlik suw jetkerip beriwdegi mashqalalar saplastırılıp, avariyalıq jaǵdaylardıń aldı alınadı.
Rayon orayında qurılıp atırǵan «Kreativ park» qurılısı qızǵın dawam etpekte. Ulıwma jer maydanı 18 gektardı quraytuǵın parkte jaslar baǵı, fontanlar, mádeniy-ǵalabalıq ilajlar ushın maydan hám saxna, amfiteatr, 10 nan aslam sawda hám xızmet kórsetiw obektleri, balalar oyın maydanshası, attrakcionlar orın alıwı jáne suw basseyni shólkemlestiriliwi názerde tutılǵan.
Qızǵın pát penen alıp barılıp atırǵan bul ilajlar bayram aldınan rayon xalqı ushın joqarı keypiyat baǵıshlap, jaratılıp atırǵan qolaylıqlar bayramǵa múnásip sawǵa boları sózsiz.

G.Turdıshova, Qaraqalpaqstan xabar agentligi