Búgingi kúnde jámiyettiń rawajlanıwınıń tiykarǵı faktorı – puqaralardıń bilimli, belsendi hám keń dúnyaqarasqa iye bolıwı bolıp esaplanadı. Insanlardı ruwxıy hám intellektuallıq jaqtan rawajlandırıwǵa qaratılǵan hár qanday baslama ayrıqsha áhmiyetke iye. Bunday ilajlar arqalı tek ǵana bilim sınaladı emes, al túrli taraw wákilleri arasında óz-ara awızbirshilik, tájiriybe almasıw hám birge islesiw ortalıǵı payda boladı.

Beruniy rayonında ótkerilgen “Ruwxıylıq kubogi” ushın “Zakovat” intellektuallıq oyını da mine, usınday áhmiyetli baslamalardan biri boldı. Onda túrli shólkem hám kárxanalar, máhálle jetiligi hám bilimlendiriw mákemelerinde miynet etip atırǵan belsendiler qatnastı, – dep maǵlıwmat beredi rayon hákimliginiń Málimleme xızmeti bólimi.
“Ózbekstan Respublikası ǵárezsizliginiń 34 jıllıǵı” múnásibeti menen “Watan ushın, millet ushın, xalıq ushın” súreni astında shólkemlestirilgen bul “Zakovat” intellektuallıq oyını joqarı dárejede ótti. Bul bellesiw hár bir qatnasıwshıǵa bilim hám aqılın sınaw menen birge, jańa ideyalar menen ilhamlanıw hám puqaralıq belsendiligin arttırıw imkaniyatın da berdi.
Nátiyjelerge bola, birinshi orındı Jaslar isleri bólimi iyeledi. Ekinshi orınǵa SEO hám JSB komandası, úshinshi orınǵa bolsa Mektepke shekemgi hám mektep bilimlendiriwi bólimi quramındaǵı “Manaviyat posbonlari” komandası múnásip boldı.
Bunday ilajlar xalıq arasında bilim hám mánawiyattı xoshametlewde áhmiyetli orın iyeleydi. “Zakovat” oyını bolsa bul baǵdardaǵı eń nátiyjeli platformalardan biri bolıp xızmet etpekte.

Qaraqalpaqstan xabar agentligi