Prezident tapsırmasına tiykarlanıp toqımashılıqta jumıs alıp barıp atırǵan 200 den aslam isbilermenniń pikirleri úyrenildi.

– Olardı qıynap atırǵan máseleler menen tolıq tanıstım. Házir sheshimlerin aytaman. Búginnen toqımashılıqta “áhmiyetli júz kúnlik” járiyalaymız,-dedi mámleketimiz basshısı.
Bárinen burın, jaǵdayı tómenlegen ayırım kárxanalardı finanslıq salamatlandırıw hám ózine túser bahanı azaytıw ilajları belgilep alındı.
Usı jılı klasterlerdiń kreditten qarızdarlıǵın girew qoyıw shárti menen 5 jılǵa shekem sozıwǵa ruqsat berildi. Endi girew qoyǵan klasterler tek ǵana tiykarǵı qarızdı tóleydi.
Awıl xojalıǵı qorı hám banklerge esaplanatuǵın procentler bolsa tiykarǵı qarız tolıq qaplanǵanınan keyin óndiriledi. Bul arqalı klasterlerde jılına 800 milliard sum aylanıs qarjı qaladı. Eger klasterler hám tiykarǵı qarız, hám procentti óz waqtında tólese, procenttiń Qorǵa ketetuǵın bóleginiń yarımı isbilermenge qaytarıladı.
Klasterlerge 2022-2023-jıllar zúrááti ushın berilgen kredit boyınsha 1-avgust jaǵdayına júzege kelgen 377 milliard sumlıq penyadan waz keshiledi.

ÓzA