Usı jıl 12-avgustta “Jeke tártiptegi isbilermenler hám ózin-ózi bánt etken shaxslar ushın qolaylı sharayat jaratıw ilajları haqqında”ǵı Prezident qararı qabıl etildi.

Oǵan bola, jeke tártiptegi isbilermenler hám ózin-ózi bánt etken shaxslardı ıqtıyarlı túrde rásmiy sektorda islewin xoshametlewshi básekige shıdamlı hám ashıq-aydın isbilermenlik ortalıǵın qáliplestiriw, hákimshilik tártip-qaǵıydalardıń tákirarlanıwshı hám artıqsha talapların biykar etiw belgilenedi.
Sonday-aq, mámleketlik dizimnen ótkeriwden baslap esabattı tapsırıwǵa shekemgi barlıq tiykarǵı xızmetlerdi birlestiretuǵın integraciyalasqan sanlı platformalar jaratıw, naq pulsız tólemlerdi qabıl etiw ushın qolaylı hám nátiyjeli mexanizmlerdi engiziw názerde tutılmaqta.
Qararǵa bola, jeke tártiptegi isbilermenler hám ózin-ózi bánt etken shaxslarǵa mámleketlik hám finanslıq xızmetlerdi onlayn tárizde kórsetiw boyınsha arnawlı huqıqıy rejim engiziledi.
2026-jıl 1-yanvardan baslap tómendegiler, yaǵnıy jeke tártiptegi isbilermenler ushın qatań belgilengen muǵdarda fizikalıq táreplerden alınatuǵın dáramat salıǵın tólew tártibi, salıq dáwirinde tovarlardı (xızmetlerdi) realizaciyalawdan dáramatı 100 million sumnan aspaǵan ózin-ózi bánt etken shaxslardı aylanıstan alınatuǵın salıq tólewden azat etiw tártibi biykar etiledi.
Jıllıq aylanısı 1 milliard sumǵa shekem bolǵan jeke tártiptegi isbilermenler hám ózin-ózi bánt etken shaxslar ushın aylanıstan alınatuǵın salıq stavkası 1 procent muǵdarında belgilenedi.

Sh.Mamaturopova,
ÓzA