Nókis rayonı “Qırantaw” awıl puqaralar jıyını turǵınları tárepinen 2025-jıl 1-máwsimi sheńberinde “Ashıq byudjet” málimleme portalı arqalı usınılǵan joybar – “Ullı elat” kóshesine 1,3 kilometr aralıqqa qara qaplamalı (asfalt) jol tósew jumısların ámelge asırıw boyınsha usınıs, dawıs beriw nátiyjelerine bola jeńimpaz dep tabılǵan edi.

Bul baslama máhálle xalqınıń infrastrukturanı jaqsılaw hám jasaw sharayatların jetilistiriw baǵdarındaǵı belsendiligi hám joqarı puqaralıq juwapkershiligin kórsetti. Házirgi waqıtta, usı joybar tiykarında kórsetilgen baǵdarda ámeliy jumıslar baslap jiberildi.
Atap aytqanda, “Ullı elat” kóshesinde qara qaplamalı (asfalt) jol tósew jumısları jedel pátlerde alıp barılmaqta. Jumıs tez arada tamamlanıp, xalqımız ushın qolaylıqlar jaratılǵan soń jolawshılardı kóp waqıttan berli qıynap kiyatırǵan mashqala saplastırılıwı kútilmekte.

Qaraqalpaqstan xabar agentligi