Parlamenttiń tómengi palatasınıń májilisinde qamsızlandırıw xızmetleri bazarın jáne de rawajlandırıwǵa qaratılǵan nızam joybarı birinshi oqıwda konceptuallıq jaqtan kórip shıǵıldı.

Atap ótilgenindey, bul nızam joybarı qamsızlandırıw xızmetleri bazarın bunnan bılay da rawajlandırıw arqalı qamsızlandırıw bazarınıń professional qatnasıwshılarına qolaylı sharayatlar jaratıw jáne qamsızlandırıw qatnasıqlarınan kelip shıǵatuǵın kelispewshiliklerdi sheshiwge qaratılǵan.
Joybar menen qamsızlandırıw bazarınıń professional qatnasıwshıları jumısında xabardar etiw tártip-qaǵıydaların qollanıw belgilenbekte. Sonday-aq, qamsızlandırıw agentliginiń jumısın tártipke salıwdıń jańa mexanizmin islep shıǵıw, qamsızlandırıwshı licenziyasın ıqtıyarlı túrde biykarlaw tártibin wákillikli mámleketlik uyım tárepinen belgilew, qamsızlandırıwshılar hám qamsızlandırıw brokerleriniń lawazımlı shaxsları ushın belgilengen mamanlıq talapları hám olardı anıqlaw tártibin jetilistiriw usınıs etilmekte.
Joybarda májbúriy qamsızlandırıwǵa baylanıslı nızam hújjetlerinde qamsızlandırıw qatnasıqlarınan kelip shıǵatuǵın kelispewshiliklerdi sheshiw hám tarawdı sanlastırıwǵa baylanıslı normalar da sáwlelendirilgen.
Sonday-aq, transport quralınan paydalanıwda májbúriy qamsızlandırıw, jol transport hádiysesi júz bergende, táreplerdiń kelisimine bola qamsızlandırıw tólemin ayıpker táreptiń qamsızlandırıwshısınan alıw máseleleri tártipke salınbaqta.
Sonıń menen birge, qamsızlandırıw xızmetleri tutınıwshılarınıń huqıqların qorǵawdı kúsheytiw maqsetinde qamsızlandırıwshı tárepinen tutınıwshıǵa beriliwi shárt bolǵan maǵlıwmatlar dizimi joybarda sáwlelendirilmekte.
Nızam joybarı menen kirgizilip atırǵan ózgerisler hám qosımshalar qamsızlandırıw xızmetleri tutınıwshılarınıń huqıqları menen nızamlı mápleriniń qorǵalıwın támiyinlewde hám qamsızlandırıw tarawınıń rawajlanıwında ayrıqsha áhmiyetke iye. Qamsızlandırıw bazarında ashıq-aydınlıqtı támiyinleydi.
Sonday-aq, májiliste elektron kommerciya tarawın jetilistiriwge qaratılǵan nızam joybarı dodalandı. Bul nızam joybarı menen “Licenziyalaw, ruqsat beriw hám xabardar etiw tártip-qaǵıydaları haqqında”ǵı nızamda elektron kommerciya tarawındaǵı elektron sawda platforması operatorı, buyırtpalar agregatorı hám sanlı striming xızmeti operatorlarınıń jumıs túrleri belgilep qoyılmaqta.
Sonday-aq, elektron kommerciya operatorları jumısın baslaǵanı yamasa tamamlaǵanı haqqında wákillikli mámleketlik uyımdı xabardar etiw tártibin engiziw, bul jumıs túrlerin baslaǵanı yamasa tamamlaǵanı haqqında xabardar etpegeni ushın juwapkershilikti belgilewshi qosımshalar kirgizilmekte.
Atap ótilgenindey, házirgi kúnde 80 nen aslam elektron kommerciya operatorları jumıs alıp barmaqta. 15 mıńnan aslam isbilermenler elektron sawda platformalarında tovar, jumıs hám xızmetlerdi realizaciyalamaqta.
Biraq olardıń jumısı ústinen qadaǵalaw mexanizmleri ornatılmaǵan bolıp, bul olar realizaciyalaytuǵın tovar hám xızmetler boyınsha tutınıwshılardıń huqıqların qorǵaw hám salıq salıw maqsetinde elektron kommerciya subektleriniń anıq esabın júrgiziw imkaniyatın bermey atır.
Nızam joybarınıń qabıl etiliwi elektron kommerciya tarawında jumıs alıp barıp atırǵan elektron kommerciya operatorlarınıń jumısında anıqlıq hám ashıq-aydınlıqtı jáne báseki ortalıǵın támiyinlew, puqaralardıń huqıqları menen nızamlı máplerin qorǵawǵa xızmet etedi. Wákillikli uyım hám elektron kommerciya operatorları arasında operativ baylanıs kanalın jaratadı, shaǵımlardı kórip shıǵıw imkaniyatın beredi.
Dodalawlarda nızam joybarınıń áhmiyetli ekenligi atap ótilip, ekinshi oqıwda da qabıl etildi.

Muhtarama Komilova, Nosirjon Haydarov (súwret), ÓzA