Parlamenttiń tómengi palatası májilisinde Mámleketlik baǵdarlamanıń usı altı aydaǵı orınlanıwın dodalawlarda deputat Dilbar Mamajanova jaslar máselesinde bir qatar sorawlardı kóterdi:

– Búgingi kúnde rásmiy túrde 1 millionnan aslam jaslar jumıssız dep tán alınǵan. Bul bolsa jaslardıń 16 procentin quraydı. Qalǵan 84 procent jaslardıń táǵdiri qanday? Talap joqarı bolǵan kásiplerge oqıtıw boyınsha qanday ilajlar kórilmekte?
Sonday-aq, jaslarǵa 2,5 mıń gektar jer maydanı diyqanshılıq etiw ushın ajıratılǵan. Biraq jaslar bul jerlerden nátiyjeli paydalana ala ma, berilip atırǵan jerlerdiń ónimdarlıǵı qay dárejede?
Deputattıń bul sorawlarına juwap berip, Kámbaǵallıqtı qısqartıw hám bántlik ministriniń orınbasarı tómendegilerdi málim etti:
– Jıldıń basında máhállelerde xatlaw ótkerilip, 9 millionnan aslam jaslardıń “Jaslar balansı” qáliplestirildi, sonnan kelip shıǵıp, individual baǵdarlama islep shıǵıldı. Xatlaw nátiyjesinde 384 mıń jaslar jumıssız dep dizimge alındı. Usı jıldıń 1-iyul jaǵdayına 161 mıń jastıń bántligi támiyinlendi.
5000 jasqa 2,5 mıń gektar jer maydanları ajıratıp berildi. 1-avgust jaǵdayına 208 mıń jaslar (54 procent) jumıs penen támiyinlengen. Qalǵan bólegin de kásipke oqıtıw, tayarlaw kurslarında, shet tillerine oqıtıw, isbilermenligin jolǵa qoyıw ilajların kóremiz.
Házirgi waqıtta 1 million emes, 782 mıń jumıssız jaslarımız bar. Durıs, jáne 821 mıń jaslar miynet bazarına kirip kelmekte. Sonıń esabınan 1 millionǵa shamalasadı.
Jaslarǵa ajıratılǵan jerlerden 7 mıń tonnadan aslam ónimler alınǵan. 35 mlrd.ǵa jaqın dáramat alınǵan. Ministrlikte “Onlayn máhálle” platformasında bul boyınsha esabatlar júrgiziledi, – dedi ministrdiń orınbasarı.
Jaslar isleri agentligi direktorı A.Sadullaev bolsa ótken 2024-jılı 152 mıń jasqa 56 mıń gektar jer berilgenin, 156 mıń tonna ónim jetistirilip, 500 mlrd.tan artıq dáramat alınǵanın málim etti. Olardıń jumısı úyrenilgenin, mashqalaların sheshiw ilajları kórilgenin aytıp ótti. Sonday-aq, Sanlı texnologiyalar ministrligi menen birgelikte zamanagóy kásiplerge oqıtıw boyınsha da bir qatar jumıslar ámelge asırılıp atırǵanın atap ótti.
Awıl xojalıǵı ministrliginiń wákili bolsa rayon hákimleri menen birgelikte jaslarǵa jer beriw jumısları alıp barılǵanın, olarǵa jaqın aymaqtaǵı, suw jeterli, ónimdarlı jer maydanların beriwge itibar qaratılǵanın aytıp ótti. Jaslardıń ónimlerin sırt el bazarına shıǵarıw ilajları kórilip atırǵanın atap ótti.

Muhtarama Komilova, Nosirjon Haydarov (súwret), ÓzA