Parlamenttiń tómengi palatasınıń májilisinde bir topar deputatlar tárepinen nızamshılıq baslaması huqıqı tiykarında islep shıǵılǵan – jasalma intellektti qollanıw arqalı júzege keletuǵın qatnasıqlardı tártipke salıwǵa qaratılǵan nızam joybarı ekinshi oqıwda statyama-statya kórip shıǵıldı.

Atap ótilgenindey, nızam joybarında “jasalma intellekt” túsinigi, jasalma intellektti engiziw hám rawajlandırıwǵa baylanıslı mámleketlik siyasattıń tiykarları, arnawlı wákillikli uyımnıń wazıypaları, málimleme resursların jaratıwda hám málimleme sistemalarınıń jumısında jasalma intellektten paydalanıwdıń ulıwma huqıqıy tiykarları belgilenbekte.
Jasalma intellektten paydalanıp jaratılǵan málimleme resursları hám jasalma intellekt texnologiyaları tiykarında isleytuǵın málimleme sistemaları insanǵa, onıń ómiri, densawlıǵı, erkinligi, abırayı hám qádirine zıyan jetkermewi hám basqa da ajıralmas huqıqların buzbawı boyınsha talap belgilenbekte.
Sonday-aq, insannıń huqıq hám erkinligine baylanıslı yuridikalıq áhmiyetke iye qararlardı qabıl etiwde tek ǵana jasalma intellektten paydalanıp jaratılǵan málimleme resursları hám jasalma intellekt texnologiyaları tiykarında isleytuǵın málimleme sistemalarınıń juwmaǵına súyenip qalıw múmkin emes ekenligi óz kórinisin tappaqta.
Joybarda jasalma intellekt texnologiyalarınan paydalanǵan halda jeke maǵlıwmatlardı nızamǵa qayshı túrde qayta islew hám onı ǴXQ jáne Internette tarqatqanı ushın hákimshilik juwapkershilik belgilenbekte.
Nızam joybarın ekinshi oqıwǵa tayarlaw procesinde deputatlar, ekspertler hám ilimpazlardıń pikiri inabatqa alınıp, joybar jáne de jetilistirilgeni aytıp ótildi.
Dodalawlardan soń nızam joybarı úshinshi oqıwda qabıl etildi.

Muhtarama Komilova, Nosirjon Haydarov (súwret), ÓzA