Oliy Majlis Nızamshılıq palatasınıń májilisinde tóreshilik sudlarınıń jumısın bunnan bılay da jetilistiriwge qaratılǵan nızam joybarı dodalandı.

Atap ótilgenindey, nızam joybarın birinshi oqıwda kórip shıǵıw procesinde ondaǵı ayırım normalar boyınsha deputatlar tárepinen bir qatar usınıslar berilgen edi. Bul usınıslar juwapker komitet hám jumısshı topar aǵzaları tárepinen tereń tallanıp, solar tiykarında joybar teksti jetilistirildi. Atap aytqanda, turaqlı jumıs alıp baratuǵın tóreshilik sudınıń quramında 5 tóreshilik sudı bolıwı kerek ekenligi haqqındaǵı talap keleshekte tóreshilik sudın shólkemlestiriwde mashqalalar keltirip shıǵarıwı, ásirese, alıs aymaqlardaǵı tóreshilik sudlarına 5 tóreshi jıynawda qıyınshılıq tuwılıwı múmkin ekenligi esapqa alınıp, komitet tárepinen sudyalardıń sanı 5 ewden 3 ewge qısqartıldı. Olar hár úsh jılda tájiriybe arttırıwı zárúr ekenligi belgilenbekte.
Nızam joybarında mámleketlik uyımlar, shólkemler hám mákemeler jáne mámleket qatnasıwındaǵı kárxanalar, sonday-aq, puqaralardıń ózin-ózi basqarıw uyımları tóreshilik kelisiminiń tárepleri bolıwı múmkin emes ekenligi belgilenbekte.
Tóreshilik sudları tárepinen jerge baylanıslı, imarat hám obektlerge iyelik huqıqın belgilew jáne byudjetten pul óndiriwge baylanıslı kelispewshilikler sheshilmewi názerde tutılmaqta.
Sonıń menen birge, bunnan bılay turaqlı jumıs alıp baratuǵın tóreshilik sudı mámleketlik emes kommerciyalıq emes shólkem tárepinen shólkemlestiriletuǵını hám onıń janında jumıs alıp baratuǵını belgilep qoyılmaqta.
Dodalawlarda nızam joybarındaǵı normalar tóreshilik sudları jumısın shólkemlestiriwdiń nızamlı tiykarların bekkemlew, maman tóreshilik sudyaları korpusın qáliplestiriwge xızmet etetuǵını atap ótilip, joybar úshinshi oqıwda qabıl etildi.

Muhtarama Komilova, Nosirjon Haydarov (súwret), ÓzA