Ózbekstannıń Fijidaǵı elshisi (rezidenciyası Tokio qalasında jaylasqan) etip tayınlanǵan Muhsinxoja Abdurahmonov usı mámleket Prezidenti Ratu Naykama Tavakekolati Lalabalavuǵa isenim jarlıqların tapsırdı, dep xabar bermekte “Dunyo” MA.

«Saltanatlı máresim aldında húrmetli qarawıl sap tartıp, Ózbekstannıń mámleketlik gimni jańladı hám mámleketimizdiń bayraǵı kóterildi.
Rásmiy ilajlardan soń bolıp ótken sóylesiw dawamında Ózbekstan hám Fiji arasındaǵı siyasiy, sawda-ekonomikalıq, mádeniy-gumanitarlıq, bilimlendiriw hám turizm sıyaqlı baǵdarlardaǵı baylanıslardıń házirgi jaǵdayı hám perspektivaları boyınsha pikir alısıldı.
Prezident Naykama Lalabalavu eki mámleket geografiyalıq jaqtan uzaq jaylasqan bolsa da, olardı óz-ara húrmet, konstruktivlik sóylesiw hám ulıwma qádiriyatlarǵa tiykarlanǵan doslıq baylanısları baylanıstırıp turatuǵının atap ótti.
Fiji jetekshisi, sonday-aq, Ózbekstan áhmiyetli strategiyalıq regionda jaylasqanı, bay tábiyǵıy resursları hám joqarı potencialǵa iye insan kapitalınıń bar ekenligin tán alıp, sońǵı jıllarda Ózbekstan Prezidenti tárepinen regionda tınıshlıq hám turaqlı rawajlanıwdı támiyinlew boyınsha alıp barılıp atırǵan konstruktivlik hám proaktiv sırtqı siyasattı joqarı bahaladı.
Sonday-aq, eki mámleket arasındaǵı diplomatiyalıq baylanıslar tariyxında birinshi márte Ózbekstannıń Fijige elshisiniń tayınlanıwı Fiji tárepi ushın da áhmiyetli tariyxıy waqıyaǵa aylanǵanı atap ótildi. Usı múnásibet penen Fiji menen eki hám kóp tárepleme baylanıslardı rawajlandırıwǵa itibar qaratqanı ushın Ózbekstan Prezidentine ayrıqsha minnetdarshılıq bildirildi.

Ushırasıw juwmaǵında Fiji Prezidenti Ózbekstan Prezidentine tereń húrmet hám qızǵın sálemlerin jolladı jáne ózbek xalqına tınıshlıq hám abadanlıq tiledi», delinedi xabarda
Sonı da atap ótiw kerek, Ózbekstan hám Fiji arasında diplomatiyalıq qatnasıqlar 2010-jıl 16-iyun kúni ornatılǵan.
Esletip ótemiz, Muxsinxoja Abdurahmonov 2021-jıl 27-sentyabr kúni Yaponiya Imperatorı Naruxitoǵa Ózbekstan elshisi sıpatında isenim jarlıqların tapsırǵan edi.

Qaraqalpaqstan xabar agentligi