Prezident Shavkat Mirziyoev jeke tártiptegi isbilermenler hám ózin-ózi bánt etken shaxslar ushın qolaylı sharayatlar jaratıwǵa baylanıslı prezentaciya menen tanıstı.

Isbilermenlikti rawajlandırıw mámleketimizle strategiyalıq wazıypaǵa aylanǵan. Ekonomikanıń rawajlanıwı, xalıqtıń bántligi hám turmıs abadanlıǵında bul tarawdıń ornı júdá úlken. Sol sebepli biznes júrgiziw qaǵıydaların ápiwayılastırılıp, qolaylıqlar arttırıp barılmaqta. Sanlı texnologiyalar ǵalaba en jayıp atırǵanı bunda qolaylı bolmaqta.

Bunı dawam ettirgen halda, ashıq-aydın isbilermenlik ortalıǵın qáliplestiriw, naq pulsız tólemler ushın qolaylıqlardı keńeytiw názerde tutılmaqta.

Oǵan bola, jeke tártiptegi isbilermenler hám ózin-ózi bánt etken shaxslar ushın 2030-jıl 31-dekabrke shekem arnawlı huqıqıy rejim engiziledi. Olardı mámleketlik dizimnen ótkeriwden baslap esabattı tapsırǵanǵa shekemgi barlıq tiykarǵı xızmetlerdi birlestiriwshi integraciyalasqan sanlı platformalar jaratıladı. Sonıń ishinde, jumısın rásmiylestiriw, bank esap betlerin ashıw hám basqarıw, salıqlardı esaplaw hám tólem, esap-sanaqlar etiw hám fiskal cheklerdi qáliplestiriw usı sanlı platformalar arqalı júrgiziledi.

Bul sistemada elektron hámiyan qalta ashılıwı isbilermenlerge dáramatların qabıllaw, xızmetkerler, kontragentler hám shólkemler menen esap-sanaqlardı ámelge asırıw, salıqlar hám basqa májbúriy tólemlerdi tólew imkaniyatın beredi. Elektron hámiyan qaltaǵa iye bolǵan jeke tártiptegi isbilermenler hám ózin-ózi bánt etken shaxslar ushın bank esapbetlerin ashıw ıqtıyarlı boladı.

2025-jıl 1-noyabrden baslap, bul processlerde QR-kod hám “tap to pay” texnologiyasınan paydalanıladı. Hújjetlerdi aralıq biometriya hám “SMS xabarnama” arqalı elektron giltsiz qol qoyıw múmkin boladı. Bul maǵlıwmatlar qaǵaz nusqadaǵı hújjetler menen teńlestiriledi. «Kúnlik tólem» tártibi tájiriybe túrinde engizilip, xızmetkerlerge tólemlerdi elektron hámiyan qalta arqalı tólew imkaniyatı jaratıladı.
2026-jıl 1-yanvardan baslap jıllıq aylanısı 1 milliard sumǵa shekemgi jeke tártiptegi isbilermenler hám ózin-ózi bánt etken shaxslar ushın aylanıstan alınatuǵın salıq stavkası 1 procent muǵdarında belgilenedi.
Jeke tártiptegi isbilermenler hám ózin-ózi bánt etken shaxslarda elektron tólemlerdi qabıllaytuǵın arnawlı QR -kodtıń bolıwı usaqlap satıw qaǵıydalarınıń májbúriy talabı etip belgilenedi. Sanlı platformadaǵı aqsha aylanısları haqqındaǵı maǵlıwmat kredit ajıratıwda inabatqa alınadı.
Prezidentimiz bul usınıslardı maqullap, jeke tártiptegi isbilermenler hám ózin-ózi bánt etken shaxslar ushın qolaylı sharayatlar jaratıw ilajları haqqındaǵı qararǵa qol qoydı.

ÓzA